Read Mizo Lushai Thufingte 2 Bible Online

Thufingte 2 - Mizo Lushai bible

Thufingte 2

¹Ka fapa, ka thu hi ngun takin ngaithla la, Ka thupêkte hi pawm tlat rawh.

²Thufing chu ngaihven la, Hriatthiam tum tlat ang che.

³A ni, hriatthiam ngên la, Hriat fuh châkin au rawh.

⁴Tangka angin zawng la, Ro phûm zawng ang maiin hai rawh.

⁵Tichuan, LALPA ṭih dân i hria ang a, Pathian hriatna i chhar chhuak ang.

⁶Finna petu LALPA a ni, Hriatna leh hmuh fuhna a hnên aṭanga chhuak a ni.

⁷Mi ngîlte tân hlawhtlinna a chhêk khâwm a, Dik taka awmte tân phaw a ni bawk.

⁸Dik taka rorêl ṭhînte chu a vêng tlat a, Amah ngaihsaktute chu an awm dân tûr a enzui ṭhîn.

⁹Tichuan, a fel leh dik i hria ang a, Ngîl taka chet dân kawng ṭha chu i hre thei ang.

¹⁰Finna chuan a rawn luhchilh ang che a, Hriatna neih chu i tân a nuam hle ang.

¹¹Hmangchâng hriatna chuan a hualhim ang che a, Hriat fuhna chuan a vêng ang che.

¹²Sual kawng ata a chhan chhuak ang che a, Thu veivir chîng te,

¹³Kawng ṭha ata pênga, Thim zînga kal tate,

¹⁴Thil sual tih lâwm viauva, Mi bum châkte,

¹⁵Kawhmawh bâwl ṭhîn, Rin tlâk hauh lohte lakah a hum ang che.

¹⁶Kam thlum taka thlêm ṭhîntu che Hmeichhe sual lakah chuan a vêng ang che.

¹⁷A tleirâwl chhuah pasal tlânsana, Pathian hmaa thutiam theihnghilhtu a ni e.

¹⁸A in pan chu thihna a ni, A kawng chuan mitthi khua a chhun.

¹⁹A hnêna kal tawh chu an kîr leh ngai lo va, Nunna kawngah an lo kal tawh ngai lo.

²⁰Mi ṭhate awm dân angin awm la, Mi dikte kawng chu zawh ang che.

²¹Mi ngîlte chu he ramah hian an awm ang a, Mi felte chu an chêng reng ang.

²²Mi sualte erawh chu he ram ata hnawh chhuah an ni ang a, Bum hmangte chu hnuh chhuah vek an ni ang.