Read Mizo Lushai Thufingte 20 Bible Online

Thufingte 20 - Mizo Lushai bible

Thufingte 20

¹Zuin mi a tiuang a, Rakzuin buaina a tichhuak. Zu rui mi fing an awm ngai lo.

²Lal thinur chu sakeibaknei rûm ang a ni a, Tithinurtu chuan a nun a chân ang.

³Intihbuainaa tel loh hi pa zahawm nihna a ni a, Mi â-te chu an inrawlh zen ṭhîn.

⁴Mi thatchhia chuan a hunah lei a rît peih lo va, Buh seng tûr zawng mah se a nei lo vang.

⁵Mihring ngaihtuahna hi li thûk tak ang a ni a, Mahse, mi fing chuan a dâwp chhuak thei.

⁶Rinawm tak nia insawi an tam hle a, Rinawm tak tak tu nge hre chhuak thei ang?

⁷Dik tak leh ngîl taka nung ṭhîn Fate chu an nihlawh e.

⁸Rorêl tûra lal a ṭhutin Thil dik lo chu a hmu nghâl ṭhîn.

⁹‘Ka thinlung a thianghlim a, sual lakah ka fihlîm,’ Tu nge ti thei?

¹⁰Bûklung rit hlei te, Tehna no lian hlei te LALPA tenzâwng a ni.

¹¹Naupang pawh a thiltihah a zia a lang, Mi ṭha a ni emaw, mi dik a ni emaw a hriat theih ṭhîn.

¹²Beng thil hre thei, mit thil hmu theite hi LALPA siam an ni e.

¹³Mut heh hle suh, i rethei dah ang e, I mit meng la, ei tûr i nei ṭeuh vang.

¹⁴‘A to mang e,’ thil leitu chuan a ti ṭhîn a, Mual an liam a, an lei tlâwmzia an uanpui ṭhîn.

¹⁵Rangkachak leh lunghlu chu a tam hle a, Thu fing tak chu lungmawi vâng tak ang a ni.

¹⁶Hmêlhriat loh leiba rulhsak tiamtu kawr chu Dahkham atân lâksak mai rawh.

¹⁷Thil ei rûk chu a tui hle a, Mahse, kâa ṭiaulung khat ṭûn ang hi a la ni ang.

¹⁸Thil ruahman laiin ngun taka ngaihtuah tûr a ni, Remruat diam hnuah chuan indo ṭan tûr a ni.

¹⁹Mi ṭawng duh, lên heh chuan thurûk a puang ṭhîn a, Mi kamtam chu kâwm suh.

²⁰Nu leh pa ânchhe lawhtu chu Thima khâwnvâr mit ang hi a la ni ang.

²¹Awlsam taka sum leh pai neih mai theihte hi A tâwpah chuan a hlâwk lem lo.

²²‘Thil sual ka thungrûl ang,’ ti mai teh suh, LALPA chu ngaichâng la, a rawn chhan ang che.

²³Bûklung inang lo hi LALPAN a ten a, Bûkna dik lo a ṭha hek lo.

²⁴Kan ke pênte hi LALPA ruat a ni, Tu nge kan kalna tûr hre thei ang?

²⁵Ngaihtuah chiang lovin thilhlan Pathian hnêna pêk tiam suh, I tiam hnuah i la inchhîr leh dah ang e.

²⁶Lal fing chuan mi sual a hmu thuai a, Tawlailîr a la chîltîr ang.

²⁷ LALPAN mihring chhûngah khâwnvâr a dah a, Thinlung chhûngril a chhun chhuak vek a ni.

²⁸Ngilneihna leh zahawmna hi lal humhimtu a ni a, Dikna avângin a lalṭhutthlêng a nghet a ni.

²⁹Tlangvâl ropuina chu an chakna hi a ni a, Upa mawina pawh an lu vâr hi a ni.

³⁰Na taka vuakna hian sual simna a thlen a, Vuak nek hian chhûng lam a tithianghlim thei.