Read Mizo Lushai Thufingte 21 Bible Online

Thufingte 21 - Mizo Lushai bible

Thufingte 21

¹Lal rilru hi LALPA thu-a awm a ni a, Lui tui a duh duha a luantîr ang hian a tidanglam ṭhîn.

²Mahni awm dân hi ṭha hlein kan hria a, Mahse, LALPA chhui chu thinlung hi a ni.

³Thil dik tih leh dik taka rorêl hi, Inthawina aiin LALPAN a duh zâwk.

⁴Induhna te, chaponate hi mi sual kaihruaitu a ni a, Chu chu thil sual a ni.

⁵Mi taima thiltum chu a hlawhtling ṭhîn a, Thil ti rum rum mi chu a hlawhchham ang.

⁶Dâwta intihhausak chu chhûm Ral mai ang hi a ni, thih a chawh bawk.

⁷Mi sual nunrâwnna chu an chungah a tla ang, Thil dik an tih duh loh avângin.

⁸Thiam loh changte rilru chu a kawi a, Mi ṭhate chuan thil dik an ti ṭhîn.

⁹Nupui âncheh tak nêna in khata chên ai chuan, In chung zâwl kila awm a ṭha zâwk.

¹⁰Mi sualte chuan thil sual an duh reng a. Lainatna an neih rêng an ṭhenawmte pawhin an hmu lo.

¹¹Mi hmusittuten hrem an tuarin, mi mâwlten an fin phah a, Zirtîrna dawngtu mi fing chuan a hriat belh ṭhîn.

¹²Mi Dika chuan mi sual chhûngkua a hmu reng a, Mi sualte chungah chhiatna a thlentîr ang.

¹³Mi rethei thu ngaithla duh lotu chu, A mangang au an ngaithla bîk lo vang.

¹⁴Thilpêkin thinrim a thawi dam a, Thinur viau pawh a rûka thamnain a beng dai ṭhîn.

¹⁵Dik taka rorêl a nihin mi ṭha an lâwm a, Mi sualte tân chuan hnâra khawn ang a ni.

¹⁶Pianpui finna hmang duh lotu chu Mitthi zîngah a awm thuai ang.

¹⁷Nawmchen thlahlel chu a pachhia ang a, Zu leh sa ngaina chu a hausa lo vang.

¹⁸Mi sual chu mi dik tlan nân an hmang ang a, Mi bum hmang pawh mi nun ngîl tlan nân.

¹⁹Nupui âncheh leh thinchhe tak bula awm ai chuan, Thlalêra awm a ṭha zâwk.

²⁰Mi fing inah chuan sum leh pai hlu tak tak a awm ṭeuh va, Mi â-te erawh chuan an ei zo zêl.

²¹Mi ngilnei, dik taka thil ti ṭhîn chu, A dam rei ang a, a hmuingîlin miin an zah ang.

²²Hotu fing chuan mi huaisente kulh a la mai thei a, Inhumhim nâna an hman chu a chhu chhe ṭhîn.

²³I hmui leh i lei vêng la, Buaina i pumpelh ang.

²⁴Mi chapo leh mi inchhuang chu ‘Hmusittua,’ an ti, Chapo takin a inluling ṭhîn.

²⁵Mi thatchhia chuan eng mah a thawk peih lo va, Rualawt rêng rêngin a thi ang.

²⁶Nilêngin mi thil a awt ngawih ngawih reng a, Mi ṭha erawh chuan ui nei lovin thil a pe ṭhîn.

²⁷Mi sual inthawina chu a tenawm a, A inthawi chhan a sual phei chuan a tenawm lehzual ṭhîn.

²⁸Thuhretu der chu hnâwl a ni ang a, Chîk taka ngaihtuah mi thu chu pawm a ni fo vang.

²⁹Mi sual chu a meng rum ṭhîn a, Mi dik erawh chu a nghet chat ṭhîn.

³⁰Finna te, thiamna te, remruatna te, LALPA kalh zawng chu eng mah a ni lo vang.

³¹Sakawr chu indona atân buatsaih a ni a, Mahse, hnehna chu LALPA thu a ni.