Read Mizo Lushai Thufingte 22 Bible Online

Thufingte 22 - Mizo Lushai bible

Thufingte 22

¹Hausak viau ai chuan hmingṭhat duh zâwk tûr a ni. Tangka leh rangkachak aiin mi ngaihsân nih a ṭha zâwk.

²Hausak leh retheih inanna chu, Pathian kutchhuak an ni ve ve.

³Mi fing chuan hlauhawm a hmuhin a biru a, Mi mâwl erawh chuan a tâwn mai a, a tuar phah ṭhîn.

⁴Inngaitlâwm la, LALPA ṭih rawh, Hausakna te, ropuina te, nunna te i nei ang.

⁵Mi kawite kawng chu hlîng leh thangin a khat a, Invêng ngun la, hawisan daih rawh.

⁶Naupang chu awm dân ṭha zirtîr la, A upat hnuah pawh a thlah lo vang.

⁷Hausaten retheite chungah thu an nei a, Pûktu chu pûktîrtu chhiahhlawh a ni mai.

⁸Hleih neih chîng chuan buaina a tâwk ang a, Thinura mi chunga tiang lek ṭhîn chu a tliak ang.

⁹Mi ngilnei, retheite ei tûr pe ṭhîn chuan Malsâwmna a dawng a.

¹⁰Mi chimawm chu hnawt bo la, Inhnialna te, buaina te, inhauna te a reh mai ang.

¹¹ LALPAN thinlung thianghlim a ngaina a, Hawihhâwm taka ṭawng ṭhin hi lal ṭhian nihna a ni.

¹² LALPAN hriatna dik nei mi chu a hum tlat a, Dawtheite thu erawh chu a paihthla ṭhîn.

¹³Thatchhia chuan, ‘Pâwnah sakeibaknei a awm, Ka chhuah chuan min seh mai ang,’ a ti ṭhîn.

¹⁴Hmeichhe sual thu chu hum thûk tak ang a ni a, LALPA huatzâwngte chu an tla lût ang.

¹⁵Naupangte hi â hle mah se, Tianga vuak reh hlauh theih a ni.

¹⁶Hausak duh vânga mi rethei tiduhdaha, Mi hausa tlawn chu tlâkranna a ni.

¹⁷Mi fingte thu sawi hi bengsikin ngaithla la, Ka zirtîr ang che.

¹⁸I hriat reng chuan i lâwm hle ang a, A ṭûl hunah i sawi chhâwng thei ang.

¹⁹ LALPA rin tlat theih nân, Vawiinah hêng hi ka hrilh che a ni.

²⁰Hêng zilhna thu leh hriat tûr sawmthum hi Ka ziak chhuahsak che a, Hetah hian remruat dân ṭha a chuang a ni.

²¹Thu dik hi eng nge a nih tih a zirtîr ang che; Thu dik hmu chhuak tûra an tirh hunah che, A chhânna tûr dik tak i hre thei ang.

²²Mi rethei chu an pachhiat avângin an thil chhuhsak suh, Rorêlnaa ṭanpuitu tûr nei lo chu rapbet suh.

²³ LALPAN a rawn ṭan ang a, Rapbettu chu a rawn rapbet ve ang.

²⁴Mi thinchhia kâwm suh la, Mi thinram ṭhian hek suh.

²⁵Chutilo chu, an awm dân i la ang a, I inâwk buai mai ang.

²⁶Mi leiba rulhsak tiam suh la, Dahkhamah ṭang hek suh.

²⁷Pêk tûr i neih loh hlauh chuan, I mutna khum chenin an lâksak ang che.

²⁸Hmânlaia in puten ramri an kham chu sawn suh.

²⁹Mi themthiam chu lalin a ruai ang a, Mi narânin an chhawr phâk ve lo vang.