Read Mizo Lushai Thufingte 24 Bible Online

Thufingte 24 - Mizo Lushai bible

Thufingte 24

¹Mi sualte awt suh la, An zînga tel châk bawk hek suh.

²Buaina tihchhuah dân an ngaihtuah ber a ni, Pawi khawih dân tûr tui takin an sep ṭhîn.

³Finna leh inhriatthiam tawnnaah Chhûngkua chu a indin nghet a,

⁴Hriatna avângin thil hlu leh mawi tak tak, Pindan chhûngah a khat vek ṭhîn.

⁵Fin hi chak ai chuan a ṭha, Hriatna hi âwmkhauh aiin a ṭha bawk.

⁶Indo hmain ngun taka râlrêl a ṭûl a, Remhria an tam chuan hmêlma an hneh nge nge ṭhîn.

⁷Mi chhawih tân thufing a ril lutuk a, Thupui vainaah sawi tûr a nei phâk lo.

⁸Thil ṭha lo hlîr suangtuahtute chu, ‘Pawi khawih hmang’ an ti ang.

⁹Mi â remruat apiang thil sual a ni zêl a, Mi dang hmusittu chu mi tenawm a ni.

¹⁰Mangan nia i chauh mai chuan, Chakna rêng i lo nei lo a ni.

¹¹Dik lo taka tihhlum tûrte chu chhan la, Thah mai tûra an hruai hlawk hlawkte chu ensan mai suh.

¹²‘Ka hriat ve chi a ni lo ve,’ ti suh, Thinlung entu chuan a hria a ni lâwm ni? Vêngtu che chuan a hre vek a, Mi tin an thil tihsual ang zêlin a thungrûl ang.

¹³Ka fapa, khawizu in rawh, a ṭha a ni, A thlâra luang a thlum bîk ang hian,

¹⁴I tân finna pawh a thlum ang, Finna nei la, i tân a la ṭha ang, I beisei pawh a thlâwn lo vang.

¹⁵Mi sualte angin mi dikte in suam tum suh la, An chênna in tihchhiatsak bawk hek suh.

¹⁶Mi dik zawng vawi sarih tlu mah se a tho leh ang, Mi sualte erawh chu thil ṭha lovin a titlu hlen vang vang ang.

¹⁷I hmêlmate an tlûkin lâwm suh la, An petekin hlim bawk hek suh,

¹⁸ LALPAN a hmu hlauh dah ang che a, a lâwm lo vang e, An chunga a thinurna a hnûk kîr ang.

¹⁹Mi sualten i rilru tibuai suh se, An sualna chu awt hek suh.

²⁰Mi sualte chuan ṭhat ni an nei lo vang a, An khâwnvâr chu tihmihsak a ni ang.

²¹Ka fapa, LALPA ṭih la, lal zah thiam rawh, An laka hel duhte kawp suh,

²²An chungah chhiatna a lo thleng thut mai ang, Chhiatna thlen theitu an ni ve ve si a.

²³Hêng pawh hi mi fing thu sawi a ni, Rorêlnaa mi zahzâwng neih hi a ṭha lo ve,

²⁴‘I ti dik e,’ mi sual hnêna titu chu Ânchhia an lawh ang a, mi tinin an hua ang.

²⁵Mi sual kamkhattu chu miin an lâwm ang a, Malsâwmna a dawng ang a, a hming a ṭha bawk ang.

²⁶Thu dik taka min chhâng ṭhîntu chu Ṭhian ṭha a ni.

²⁷Pâwn lama i hna tifelin i lo lam te tifel hmasa la, Tichuan, i in tûr chu sa rawh.

²⁸I ṭhenawmte dâwtin hêk suh la, Ngaih kawih theihin an chungthu sawi hek suh.

²⁹‘Min tih angin a chungah ka ti ve ang, A sualna chu ka thungrûl dâwn,’ ti bawk hek suh.

³⁰Mi thatchhe lovah ka va kal a, Mi tlawktlaw grep huan chu ka va fang a,

³¹Ngai teh, hlîng a lo khat vek a, Kângṭhaiin a khuh lûk a, A lung palte a lo chim rem rum mai.

³²Chûng chu ka han en chuan ka ngaihtuah a, Zir tûr ka chhar ta a.

³³I duh chuan han mu hlek ta che, Han châwl hahdam hlekin Kut hûmin zâl teh rêng:

³⁴Retheihna chu rûkru angin a lo kal thuai ang a, Pachhiatna chuan sipai angin a rawn nang vat ang che.