Read Mizo Lushai Thufingte 25 Bible Online

Thufingte 25 - Mizo Lushai bible

Thufingte 25

¹Hêng pawh hi Solomona thufing, Judai ram lal Hezekia hoten an ziak chhâwn a ni.

²Thil thup hi Pathian ropuina a ni a, Thil hmuh chhuah hi lal ropuina a ni.

³Vân sânzia te, tuifinriat thûkzia te angin, Lal rilru pawh hriat chhuah rual a ni lo.

⁴Tangkaraw êkchhia paih la, Thil chhertuin thil mawi tak a chher thei tawh ang.

⁵Lal kiang aṭangin mi sual hnawt bo la, A ramah dik taka rorêl a ni ang.

⁶Lal hmaah intivei suh la, Milian zîngah tel chîng hek suh.

⁷Aia milian ṭhutna kian tûra tih nih ai chuan, Ṭhutna ṭha zâwka ṭhu tûra sâwm nih a ṭha zâwk.

⁸I thil hmuh thubuaiah thlen mai suh, Thu hre chiang zâwkten an rawn sawi leh si chuan, Engtin nge i tih tâk ang?

⁹Ṭhenawmte nên inhnial inhnial mah ula, Mi dang thurûk chu puangzâr suh,

¹⁰Chutilo chu, a lo hriaten an dem ang che a, I hmingchhiat a reh lo vang.

¹¹A hun taka thu sawi chu, Rangkachak mûm tangkaruaa phûm ang a ni.

¹²Mi fing zilhna chu ngaithla duhtu tân chuan, Rangkachak ṭha ber zungbun leh ṭhi aiin a ṭha.

¹³A tîrtu tân palai rinawm tak chu, Ni sen sat laia vûr tui ang hi a ni. A tîrtu chu a tiharh sawng sawng ṭhîn.

¹⁴Pêk tiam si-a pe si lotu chu, Ruah pai lo chhûm, thli chhêm lên ang hi a ni.

¹⁵Zai dawh taka thlêm heuh heuhvin lalte an tilungawi a, Khauh hle mah se, thu nêmin a hneh thei.

¹⁶Khawizu i tawn chuan a tâwk chauh in rawh, Chutilo chu, a ngei ang che a, i luak mai ang.

¹⁷Ṭhenawm inah lêng lutuk suh, A ning ang che a, a haw hlauh dah ang che.

¹⁸Mahni ṭhenawm dâwta hêktu chu Tuboh leh khandaih ang a ni, thal zum tak nên.

¹⁹Mangan nia mi bum chîng chunga innghah chu, Ha nghînga thil ṭhial leh ke na chunga kal ang a ni.

²⁰Mi lungngai bula hla sak chu, Khaw vawh nia kawr hâk phelh leh chingala pem sil ang a ni.

²¹I hmêlma a rilṭâm chuan ei tûr pe la, A tuihâl chuan in tûr pe rawh.

²²Tichuan, sen awp awp khawpin i tizak ang a, LALPAN a rûl ang che.

²³Hmâr thliin ruah a rawn thlen ang hian, Inrêl rûk hian thinrim a tichhuak ṭhîn.

²⁴Nupui phunchiar tak nêna in zau taka awm aiin, In chung zâwl kila awm a ṭha.

²⁵Ram hla tak aṭanga thu lâwmawm hriat chu, Mi chau tân tuisik ang a ni.

²⁶Mi sual hmaa mi dik tlâwm chu, Tuihna nu leh tuikhur bawlhhlawh ang hi a ni.

²⁷Khawizu in tam lutuk a ṭha lo ve, Fak hlawh tum luattuk pawh a ṭha hek lo.

²⁸Mahni inthunun thei lo chu, Khaw kulh bang chim ang hi a ni.