Read Mizo Lushai Thufingte 27 Bible Online

Thufingte 27 - Mizo Lushai bible

Thufingte 27

¹Naktûka i awm dân tûr uanpui lâwk suh, Eng nge lo thleng dâwn i hre si lo.

²Mi dangin fak che rawh se, Nangmah zawng infak suh.

³Lung leh ṭiauvut hi a rit hle a, Mi â thinur chu a tawrhhlelhawm zâwk.

⁴Thinurna tuar hi a hrehawmin a rit a, Îtsîkna erawh hi chu tu nge tuar zo vang?

⁵A langa inzilhhau hi A rûka hmangaih ai chuan a ṭha zâwk.

⁶Hmangaihtu ben chu ṭhatna tûr a ni a, Hmêlmaten min lawm hûrh chuan fîmkhur a ṭha.

⁷Puar hle lai chuan khawizu pawhin min ngei a, Rilṭâm tân chuan thil kha tak pawh a thlum.

⁸Mahni bu awplum lo sava leh Mahni in leh lo ngaihsak lo chu an inang.

⁹Hriak leh têl rimtuiin mi a tilâwm a, Ṭhian ṭha thurâwn fing pawh a lâwmawm ṭhîn.

¹⁰I pa ṭhian leh nangma ṭhian chu thlauhthla suh, Buaina a lo thlenin unaute kher pan suh, Unau hla taka awm aiin ṭhenawm hnai an ṭangkai zâwk.

¹¹Ka fapa, fing la, kei ka lâwm ang, Min deutute ka chhâng let ve thei dâwn nia.

¹²Mi fing chuan hlauhawm a hmu lâwk a, Mi â erawh chuan a tâwn mai a, a tuar phah ṭhîn.

¹³Hmêlhriat loh ba rulhsak tiamtu kawr chu, Dahkham atân lâksak mai rawh.

¹⁴Zîng taka mi kaithova, Ring taka chibai bûk chîng chu, Ânchhia anga ngaih a ni ang.

¹⁵Nupui âncheh tak chu, Khawchhiat ni-a in far reng ang hi a ni a,

¹⁶Tihreh tum chu thli tleh lo dan tum leh Sahriak hûm tum ang hi a ni.

¹⁷Thîrin thîr a tihriam a, Mihring pawhin mi dang hnên aṭangin a zir ṭhîn.

¹⁸Theipui kûng chu enkawl ṭha la, a rah i ei ang, Chhiahhlawh, a pu thu awih chu, chawimawi a ni ang.

¹⁹Tuiah thla kan hmu ṭhîn angin, Mihring thinlung pawh a nunah a lang.

²⁰Seol leh Abadon chuan tâwk tih lêm an nei lo angin, Mihring mit pawhin tâwk tih a nei lo.

²¹Thukah tangka leh rangkachak an rawh thianghlim angin, Mihring hmingṭhatna pawh fiah a ngai ṭhîn.

²²Mi â âtna chu sumah buh nên dêng nek mah la, A âtna chu a kiang chuang lo vang.

²³I berâm rual chu fîmkhur takin enkawl la, I ran rual chu ngaihven ṭha rawh.

²⁴Hausakna hian a daih kumkhua lo va, Lalna pawh hian chhuan tam a daih lo asin.

²⁵Buhpâwl ât la, a chawr leh hma ang a, Tlâng hnimte zai bawk ang che.

²⁶Tichuan, i berâm hmulte i sin ang a, I kêl man chuan ramte i lei thei ang.

²⁷I kêl hnutete chu a tam ang a, i tlân ang a, I chhûngte leh i awmpui nulate ei khawp a tling bawk ang.