Read Mizo Lushai Thufingte 29 Bible Online

Thufingte 29 - Mizo Lushai bible

Thufingte 29

¹Zilh fo tawh pawha luhlullui zêl chu, Dan rual lohva tihchhiat rup a ni ang.

²Mi dik an lalin mi an hlim a, Mi sualin ro an rêlin mi an rûm ṭhîn.

³Finna ngaina chuan an pate an tilâwm a, Nawhchizuar kawptu chu an intlakral ṭhîn.

⁴Dik taka lalin ro a rêl chuan ram a ding chhuak a, Thamna ngawt a ngaihtuah chuan ram chu a tluchhe ṭhîn.

⁵Ṭhenawm fak der chîng chuan, Mahni awhna tûr thang a kam a ni.

⁶Mi sual chu a sualnain a âwk ṭhîn a, Mi dik erawh chu hlim takin a zai ṭhîn.

⁷Mi dik chuan rethei ngaihsak nachâng a hria a, Mi sual erawh chuan a hre ve lo.

⁸Pawisak nei lote chuan khua an chawk buai a, Mi fingte erawh chuan an vawng dai ṭhîn.

⁹Mi fingin mi â a khin chuan, Mi â chuan a ânkhum a, Bâng lêk lovin a nuihzat ṭhîn.

¹⁰Thisen chhuah chîng chuan mi dik a hua a, Mi ngîl erawh chuan mi dik nunna hum a tum ṭhîn.

¹¹Mi â chuan a thinur a thup thei lo va, Mi fing chu a insûm a, a pal dai ṭhîn.

¹²Rorêltuin dâwt a bengkhawn zêl chuan. A ṭhuihruaite chuan dâwt an chîng mai ang.

¹³Mi rethei leh amah tiduhdahtu chuan inanna an nei, LALPAN hmuh theihna mit a neihtîr ve ve.

¹⁴Mi rethei chungthu dik taka rêl ṭhîn lal chuan, A lalna chu kumkhuain a tinghet ang.

¹⁵Talhfiak leh thununna hian mi a tifing a, Naupang, duh duha tla chuan a nu a tizak ṭhîn.

¹⁶Mi sual an lal chuan sual a pung a, Mi dikte chuan an tlûkchhiat hun an hmu ngei ang.

¹⁷I fa chu thunun ṭha la, i hahdam ang a, I thinlung tilâwmtu a la ni ang.

¹⁸Pathian hruai loh hnam chu an boral ṭhîn, Pathian Dân zâwm hnam erawh chu an nihlawh e.

¹⁹Chhiahhlawh chu thu maia siam ṭhat theih a ni lo, Hre kur mah se, a zâwm chuang lo vang.

²⁰Pâwng ṭawng zung zung chîng mi ai chuan, Mi mâwl chan a la ṭha ang.

²¹A naupan têt ata chhiahhlawh chu i duat lutuk chuan, I chungah thu a la nei mai ang.

²²Thinchhia chuan buaina a chawk chhuak a, Thinram chuan pawi a khawih rem rum ṭhîn.

²³Chapona hian mi a titlâwm a, Inngaihtlâwmna hian mi a chawimawi.

²⁴Rûkru kawptu chuan mahni hmêlmaah a insiam a, Chhia a chham a, thu dik a sawi leh si lo.

²⁵Mihring hlauhna hian mi a phuar ṭhîn a, LALPA rin erawh chu a muanawm a ni.

²⁶Mi tam takin rorêltu duhsak nih an duh a, LALPA erawh chuan mi ro dik takin a rêlsak ṭhîn.

²⁷Mi dikte chuan mi sual an ten a, Mi sualte chuan mi dik an hua.