Read Mizo Lushai Thufingte 3 Bible Online

Thufingte 3 - Mizo Lushai bible

Thufingte 3

¹Ka fapa, ka zirtîrna theihnghilh suh la, Ka thupêkte vawng tlat ang che.

²Tichuan, rei tak i dam ang a, I hmuingîl zêl bawk ang.

³Ngilneihna leh rinawmna hi thlah hlek suh la, I nghâwngah chuan zem tlat langin, I thinlung phêkah chuan ziak lût ang che.

⁴Pathian leh mihring hnên ata Khawngaihna te, duhsakna te i dawng dâwn nia.

⁵I thinlung zawng zawngin LALPA ring la, Nangma hriatnaah innghat hauh suh,

⁶I thiltih apiangah LALPA hre reng ṭhîn la, I kawng a tihtluansak ang che.

⁷Mahni fing inti hle suh la, LALPA ṭih la, sual kalsan rawh.

⁸I taksa tân hrisêlna a ni ang a, I na atân damna a ni bawk ang.

⁹I sumin LALPA chawimawi ṭhîn la, I neih pung hmasate nên chuan.

¹⁰Tichuan, i buh inte a khat ang a, I uain sâwrkhur a liam bawk ang.

¹¹Ka fapa, LALPA kaihhruaina hmusit suh la, A zilhna pawh ngainêp hek suh.

¹²Pain a fa duh tak a thunun angin, LALPAN a hmangaihte a thunun ṭhîn asin.

¹³Finna hmu chhuaka, Hriatna neitu chu a nihlawh e;

¹⁴Tangka neih aiin hlâwkna a tam zâwk a, Rangkachak hlu tak aiin a duhawm zâwk.

¹⁵Lunghlu aiin a hlu zâwk a, A tluka hlu duhthu sâm tûr a awm lo ve.

¹⁶Dam reinate a ding lamah a awm a, A vei lamah hausakna leh ropuinate a awm.

¹⁷A kawng chu a nuam a, A kalkawng chu hahdam tak a ni.

¹⁸Amah vuantute tân nunna thing a ni a, Amah zuitute chu an nihlawh e.

¹⁹ LALPAN finna hmangin lei a siam a, Hriatna hmangin vân khi a din.

²⁰A finna chuan tuithûkpuite a tiṭhen a, Chhûm chuan ruah a tlâktîr.

²¹Ka fapa, finna leh hriat fuh theihna hi kawl tlat ang che, I hmuh phâk lohvah kal sawn suh se.

²²I tân nunna a ni ang a, I nghâwng atân mawina.

²³Thlamuang takin i kal ang a, Eng mah i chhuih lo vang.

²⁴I mut hunah hlauh rêng i nei lo vang, I mu ang a, tui takin i muhîl ang.

²⁵Mi sualte chunga thleng ṭhîn chhiatna ang hi, Hlauhawm a thlen thut hlau suh la,

²⁶ LALPAN a vêng him tlat ang che, I ke thanga awh a phal lo vang.

²⁷I theih phawt chuan mamawhte tân i thil ṭhate ui suh,

²⁸Nei reng siin i ṭhenawm hnênah chuan, ‘Kal ta rih la, naktûk lamah lo kal leh rawh, Ka lo pe tawh ang che,’ ti suh.

²⁹Ngaihngam taka i bula awm I ṭhian chungah thil sual phiar suh.

³⁰I pawi khawih lo chu chhan awm lovin khing suh.

³¹Mi nunrâwng chu awt suh ang che, A awm dân pawh zui suh.

³²Kawhmawhbâwlte chu LALPAN a ten a, Nun ngîlte erawh chu a rinzâwng tak an ni.

³³Mi sual chhûngkua chu LALPAN ânchhia a lawh ṭhîn a, Mi dik chhûngkua erawh chu mal a sâwm ṭhîn.

³⁴Chapote chu a hmusit a, Pachhiate erawh chu a duhsak ṭhîn.

³⁵Mi fingte chuan chawimawi an hlawh ang a, Mi â-te chan tûr erawh chu mualphona mai a ni.