Read Mizo Lushai Thufingte 30 Bible Online

Thufingte 30 - Mizo Lushai bible

Thufingte 30

¹Jakea fapa Agura thuchah : Chu mi thuchhuak chuan heti hian a ti: Pathianin min awmpui lo, Pathianin min awmpui lo va, eng mah ka ti thei lo,

²Mi azawngah ka mâwl a, An fin angin ka fing ve lo.

³Finna ka zir lo va, Mi Thianghlima ka hre hek lo.

⁴Tu nge thli hum khâwm theia, Puana tui fûn thei awm? Lei huam chin hi tu nge ri siam? A hming i hria em? A fapa hming pawh i hria em ni?

⁵Pathian thu tinrêng hi a rin tlâk a, Amah bêltute tân phaw a ni.

⁶A thute chu belhchhah hauh suh, Chutilo chu, a hau ang che a, Mi dawthei i ni dah ang e.

⁷Ka thih hma hian thil pahnih ka dîl a che, Mi hnial lul suh,

⁸Thu lawilo leh dâwt lakah min hum la, Min tihausa lo la, min tipachhe hek suh, Ka ei tûr tâwk min pe ang che.

⁹Ka tlai luat chuan ka phat ang che a, ‘LALPA in tih hi tu nge ni?’ ka ti vei dah ang e. Ka pachhiat luat lahin rûk ka ru ang a, ka Pathian hming ka tihliau dah ang e.

¹⁰Chhiahhlawh chu a pu hnênah rêl suh, Ânchhia a lawh ang che a, thiam loh i chang dah ang e.

¹¹Mahni pate ânchhe lawh duh an awm a, Mahni nute duhsak nachâng hre lo an awm.

¹²Mahni ngaiha fel inti hle an awm a, Mahse, an inhrufai kim si lo.

¹³Ṭhenkhat chapo tak an awm a, An va meng sâng kher êm!

¹⁴Mi retheite ei nân an hâ chu khandaih ang a ni a, Pachhiate ṭhial nân an hapui chu chemte angin a hriam.

¹⁵‘Khawi, khawi,’ ti châmchi ṭhîn, Fanu pahnih vangvatin a nei. Thil pathum pali-a lungawi thei lo, Tâwk tih nei ngai lo an awm:

¹⁶Thlân, chhûl ching, Tui khawpkham lo leichâr leh ‘A tâwk ta e,’ ti ngai lo mei.

¹⁷Mahni pa nuihzata, nu zilhna hmusittu mit chu, Luidung choakin kher sela, Mulukawlh novin ei rawh se.

¹⁸Thil pathum pali mak ka tih lutuk, Ka hriatthiam theih loha awm:

¹⁹Vânlaizâwla mupui lên dân, Lungpui chunga rûl tleng dân, Tuifinriat chunga lawng kal dân, Nula hmaa mipa chêt dân.

²⁰Nupui rinawm lo tih dân chu hetiang hi a ni: A uire a, a inbual fai a, ‘Thil sual eng mah ka ti lo ve,’ a ti ṭhîn.

²¹Thil pathum pali, khawvêlin a ngaihtheih loh, Tawrhhlelhawm tak thil tih a awm:

²²Lal ngai lo lal, mi â tlaipuar,

²³Hmeichhe huatthlala pasal nei, Chhiahhlawh nula, a pi lântu.

²⁴Khawvêlah thil tê tak tê si fing hle si an awm:

²⁵Fanghmîr: chak lo hle mah se Nipui laiin chaw an chhêk ṭhîn.

²⁶Sangawi, an viak a ṭha lo hle a, Lungpui hnuaiah bu an nei.

²⁷Khau, lal nei lovin a rualin an awm ṭhîn.

²⁸Daidêp: khawiah pawh man mai theih a ni, Mahse, lal inah pawh an chêng.

²⁹Thil pathum pali kal vêl mit la tak tak a awm:

³⁰Ramsa zawng zawng aia huai, Hlauh nei lo sakeibaknei,

³¹A rual zînga kêlchal: ârpa kal luah luah; A sipai zînga lal vei vêl.

³²I ât êma, chapo taka thil sual i tih dâwn chuan, Invêng ang che.

³³Hnutetui i chawh i chawh chuan a khal a lo chhuak ang a, Mi hnâr i chumsak chuan a lo thi ang, Chutiang bawkin thinur i chawh thawh chuan, Insualna a thleng ang.