Read Mizo Lushai Thufingte 31 Bible Online

Thufingte 31 - Mizo Lushai bible

Thufingte 31

¹Hêng hi lal Lemuela thuchah, A nu’n a zirtîr chu a ni:

²Ka fapa, ka rîla rah, Ka ṭawngṭai chhânna ngaithla rawh,

³Lalte tichhe ṭhîn hmeichhe sual hnênah I chakna chu pe suh la, intlakral suh.

⁴Lemuel, lal tân zawng uain in tûr a ni lo ve, Rorêltuten zu hi lam chhên tûr a ni hek lo.

⁵Zu an in chuan Dân an theihnghilh a, Mi dik chan tûr an ngaihthah ṭhîn.

⁶Retheite chuan zu in ta se, Rilru mangangte chuan uain lo in ang hmiang;

⁷An retheihna theihnghilhin, An rilru hah a chhâwk mahna.

⁸Mahni tâna sawi thei lo chu sawisak la, Baihvaite pawh chhan rawh.

⁹Retheite leh pachhiate thu chu Dik takin rêlsak ṭhîn ang che.

¹⁰Nupui ṭha hmuh hi har tak a ni a, Lungmantam aiin a hlu zâwk asin.

¹¹A pasal chu ngaihngam takin a awm thei a, Kawng engkimah a hlâwkpui êm êm.

¹²A dam chhûng zawngin thil ṭha a tihsak a, Thil ṭha lo a ti ngai lo.

¹³Berâm hmul leh la a zawng khâwm a, Hlim takin a dek ṭhîn.

¹⁴Ram hla tak aṭanga buh tawlh sumdâwng lawng angin, Ei tûr a la khâwm ṭhîn.

¹⁵Khawvâr hmaa thovin an chhûngkaw tân rawng a bâwl a, Chhiahhlawh nulate tih tûr a rêl fel ṭhîn.

¹⁶Ram ṭha en thlithlaiin a lei a, Ama kutkawih ngeiin grep huan a siam.

¹⁷Taima tak a ni a, thahrui nei tak a ni, A che reng mai.

¹⁸A sumdâwnnaa hlâwk tûr chu a hre êm êm a, Zân rei tak tak thlengin a men phah ṭhîn.

¹⁹Hmui thlûr a thlûr a, La a kai a.

²⁰Rethei tân a thilphal a, Tlachhamte a chhawmdâwl ṭhîn.

²¹Vûr tla mah se a hlauthâwng lo, A chhûngte chuan puan lum an nei vek si.

²²Puan chhuatphah mawi tak a tah a, Maimaw puan te, puan senduk te a sin.

²³A pasal chu mi tinin an hria a, Kulh kawngkaa upa ṭhu khâwm zîngah a tel ve ṭhîn.

²⁴Puan zai sîn a tah a, a hralh ṭhîn a, A kâwnghrên tah chu sumdâwngte hnênah a hlân ṭhîn.

²⁵Thil ti thei tak, ngaihsânawm tak a ni a, Lungkham tûr eng mah a nei lo.

²⁶Thu fing tak tak a chhâk chhuak a, A thu a dam êm êm.

²⁷Chhûngkaw khawsak a rêl fel ṭhîn a, A awm mai mai ngai lo.

²⁸A fate chuan lâwmthu an hrilh a, A pasal pawhin a fak bawk a.

²⁹‘Nutling tak tak an tam a, Nang zawng i lawr lak e,’ tiin.

³⁰Ngaihnobeina hi engmahlo mai a ni; Hmêlṭhatna pawh a chuai mai ṭhîn. LALPA ṭihtu hmeichhia erawh chu, Chawimawi tûr a ni e.

³¹A thil tih avângin fak ula, A taihmâk avângin mi tinin chawimawi rawh se.