Read Mizo Lushai Thufingte 4 Bible Online

Thufingte 4 - Mizo Lushai bible

Thufingte 4

¹Fate u, pa kaihhruaina ngaithla rawh u, Ngaihven ula, hriatthiam theihna in nei dâwn nia.

²Zir tûr ṭha chu ka hrilh che u a, Ka zirtîrna hi ngaihthah suh u.

³Ka pa fapa neihchhun ka ni a, Ka nu’n min duat hle ṭhîn.

⁴Ka pa chuan hetiang hian min zirtîr ṭhîn: ‘Ka thu hi vawng tlat la, Ka thupêkte zâwm la, i nung dâwn nia.

⁵Finna leh hriatthiamna neih tum la, Ka thu hrilh che hi theihnghilh suh la, Ngaihthah bawk hek suh.

⁶Tlânsan suh la, a vêng ang che, Pawm tlat la, a hum ang che.

⁷Finna neih hi thil pawimawh ber a ni, Thil dang zawng aiin hriatthiamna neih tum rawh.

⁸Ngaisâng la, a chawisâng ang che, Pawm tlat la, a chawimawi ngei ang che.

⁹I tân diar mawi tak a ni ang a, Lallukhum ropui tak a ni bawk ang,’ tiin.

¹⁰Ka fapa, ka thu hi ngaithla la, Ka thu sawi hi pawm rawh, Tichuan, i dam rei ang.

¹¹Finna kawng ka zirtîr che a, Kawng ngîlah chuan ka hruai ṭhîn che.

¹²Tah chuan kal la, dîptu eng mah i tawng lo vang, Tlân vak mah la, i tlu lo vang.

¹³Kaihhruaina hi pawm tlat la, inthlahdah suh, Zawng reng rawh aw, i nunna tûr a ni.

¹⁴Mi sualte kawngah chuan kal ve suh la, Mi suaksualte awm dân zui suh.

¹⁵Hawisan daih la, inhnamhnawih suh, Pênsan daih la, kalsan vang vang ang che.

¹⁶Pawi an khawih phawt loh chuan an mu thei lo, Tu emaw tal an tihbuai zet loh chuan an mut a chhuak thei lo.

¹⁷Suahsual hi an chaw a ni a, Nunrâwn hi an uain a ni.

¹⁸Mi dikte awm dân erawh chu zîng êng ang hi a ni, A lo êng tial tial a, ni a lo chhuak ta ang hi.

¹⁹Mi sualte kawng chu zân thim ang hi a ni, An inchhuih tlûkna tûr pawh an hre thei lo.

²⁰Ka fapa, ka thu hi ngaihven la, Ka thu sawi hi bengkhawn rawh.

²¹A bosan che phal suh la, I thinlungah vawng tlat ang che.

²²A hmutute tân nunna a ni a, An taksa tân damna a ni.

²³I thil ngaihtuah dânah fîmkhur hle la, I ngaihtuah chuan i nun a kaihruai ṭhîn a ni.

²⁴Chaltlai taka ṭawng chîng suh la, Bum chîng hek suh.

²⁵I hma lam thlîr ngun la, Dîng takin en tlat rawh.

²⁶I kalna tûr en ngun la, I tih tawh chu a hlawhtling ang.

²⁷Ding lamah emaw, vei lamah emaw pêng suh, Sual lakah i ke vêng ṭha rawh.