Read Mizo Lushai Thufingte 5 Bible Online

Thufingte 5 - Mizo Lushai bible

Thufingte 5

¹Ka fapa, ka finna hi ngaihven ṭha la, Ka hriatna hi bengkhawn ṭha rawh.

²Tichuan, awm dân ṭha chu i hria ang a, I thu-ah chuan hriatna i neih a lang bawk ang.

³Hmeichhe sual chu a ṭawng a thlum êm êm a, Sahriak aiin a dang a nâl a ni.

⁴A hnuah chuan a ṭawng a bak ang a, Khandaih hriam tawn angin a hriam bawk ang.

⁵Thihna panin a ni a kal, A kalkawng chuan Seol a chhun.

⁶Nunna kawng rêng zawh a tum lo, Kawng dik lo a zawh a, Amah lah chuan a hre si lo.

⁷Chuvângin, ka fapate u, ngaithla ula, Ka thu sawi hi pênsan suh u.

⁸A lak aṭang chuan inthiarfihlîm ula, A kawngka pawh hnaih suh u.

⁹Mi dangin i zahawmna an chang ang a, Nunrâwng kutah i thi mai dah ang e.

¹⁰Mi dang daihin i hausakna an chên ang a, I thawhrim rah hnam dangin an nei ang.

¹¹I thi tûr chu i rûm ang a, I chêrin i chak lo hle bawk ang.

¹²‘Kaihhruai ka hreh ṭhînzia tak kha aw, Zilhna ka hmusit êm êm ṭhîn.

¹³Mi kaihruaitute aw ka hre duh lo vei a, Min zirtîrtute thu ka ngaihsak ngai hek lo.

¹⁴Pung khâwm zîngah ka mualpho ṭêp tawh a lo ni,’ i la ti ang.

¹⁵Nangma tuizêma tui ngei in la, I tuikhuah ata lo chhuak chu.

¹⁶I tuihna chu engah nge a chik darh anga, Kawtlaiahte a luan ral mai mai ang?

¹⁷Nangma tân chauh ni se, Mi dang tân ni suh se,

¹⁸I tuihna chuan malsâwmna dawng sela, I tawn tirh nupui chu hlim nân hmang rawh.

¹⁹Zukla nalh tak, saza tuai ang a ni, A ṭang nêmah tlei la, A hmangaihna chuan zial che rawh se.

²⁰Ka fapa, mi dang nupui zûnah engah nge i uai ang, Hmeichhe dang ṭâng engah nge i vawn ang?

²¹ LALPAN i thiltih zawng zawng a hmu vek a, I nun zawng zawng a enfiah ṭhîn.

²²Mi sualte chu an sualna ngeiin a âwk a, An sualna chuan a phuar tlat ṭhîn.

²³An insûm theih loh avângin an thi ang a, An ât em avângin an bo daih ang.