Read Mizo Lushai Thufingte 6 Bible Online

Thufingte 6 - Mizo Lushai bible

Thufingte 6

¹I ṭhenawm aia tuar i intiama, Hmêlhriat loh leiba rûl

²tûra i insawi awh tawha, I thutiama i inhlin bawk si chuan;

³Ka fapa, i ṭhenawmpa kutah chuan i âwk ta a ni. Ti hian intihchhuah tum ang che, A hnênah kal thuai la, ngaihdam dîl rawh, I thu i sût a phal theih nân ngên chiam ang che,

⁴Mutsan hauh suh ang che, Chawlh hahdamsan hek suh.

⁵Sakhi âwk chhuak a tlân ang leh, Sava âwk chhuak a thlâwk daih ang mai hian, A thang ata chhuak vang vang rawh.

⁶Nang, thatchhepa, fanghmîr hnênah kal la, An awm dân hi en rawh, I fin phah mial mahna.

⁷Lal an nei lo, hotu leh hruaitu pawh an nei lo.

⁸Nipui lai chuan chaw an zawng a, Buhseng hunah ei tûr an khâwl khâwm ṭhîn.

⁹Thatchhepa, eng chen nge i mut dâwn? Engtikah nge i ṭhanharh ang?

¹⁰‘Mu leh hlek ang, chhîng hlek ila, Kut kuangkuahin zâl hlek teh ang,’ i tih chhûngin

¹¹Retheihna chu mikhual angin a lo thleng thut ang a, Tlâkchhamnain râl ang maiin a rawn nang thut ang che.

¹²Mi bengtlalo, mi chimawm chu, Thu veivirin a hmanhlel a,

¹³A mit siaiin a ke a phût a, A kut a lek vêl ṭhîn.

¹⁴A rilru kawi tak chuan thil sual a ruahman ṭhîn, Innghirnghona a tichhuak ṭhîn.

¹⁵Chuvângin, manganna chuan a nang thut ang a, Siam ṭhat rual loh chhiatna a tâwk ngei ang.

¹⁶Thil paruk-pasarih LALPA huatzâwng, A ten êm êm a awm:

¹⁷Mit chapo te, dâwt sawi chîng te, Pawi khawih lo thattu te,

¹⁸Thil sual ngaihtuah chhuah chîng ṭhîn te, Sual ti tûra ngal chak hle te,

¹⁹Thuhretu der, dâwt phuh chhuak te, Unau innghirnghotîrtu te.

²⁰Ka fapa, i pa thupêkte vawng tlat la, I nu zirtîrna pawh hawisan hek suh.

²¹I thinlungah châm rêng sela, I nghâwngah zem tlat rawh.

²²I kalna apiangah a hruai ang che a, I mut hunah a vêng ang che, I thawh hunah kawng ṭha a hrilh ang che.

²³An thupêkte chu khâwnvâr a ni a, An zirtîrna chu êng a ni, An hruaina chuan nun dân ṭha chu a kawhhmuh ang che.

²⁴Hmeichhe sual lakah a vêng ang che, Mi dang nupui kam thlum tak lakah nên.

²⁵A tîtuai ṭha ît suh ang che, A mitmei chuan man che suh se.

²⁶Chhang tlang khatin nawhchizuar a lei theih a, Uirenu erawh chuan i nun hlu tak a veh a ni.

²⁷Kawr kâng lovin mei hi a pawm theih em ni?

²⁸Ke kâng lovin meiling a dai theih em ni?

²⁹Ṭhenawmpate nupui chhaih chu chutiang bawk chu a ni; Khawihsak phei chuan an tuar ngei ang.

³⁰Rilṭâm avânga thil rutu chu Miten an hmusit lem lo.

³¹An man hlauh erawh chuan A lêt sarih a chawi ang a, A neih zawng zawng a chân mai ang.

³²Mi nu uiretu chu a â hle a ni, Ama nun a tichhia a ni.

³³An hêm hrep ang a, a mualpho hle ang, A hming a chhe kumkhua bawk ang.

³⁴Thîkthu avânga thinrim hi a tluka na a awm thei lo, Dîm lêk lovin phuba a la ngei ang.

³⁵Thlêm lungawina eng mah a duh lo vang a, Thamna pe ṭeuh la, a lungawi chuang lo vang.