Read Mizo Lushai Thufingte 7 Bible Online

Thufingte 7 - Mizo Lushai bible

Thufingte 7

¹Ka fapa, ka thu hi awih la, Ka thupêkte hi vawng tlat ang che.

²Ka thupêk hi zâwm la, i nung dâwn nia, Ka zirtîrna hi i mitnaute angin hum rawh.

³I zungṭangah bun la, I thinlung phêkah chuan ziak rawh.

⁴Finna chu, ‘Ka farnu,’ ti la, Hriatthiamna chu, ‘Ka laichînnu,’ ti rawh.

⁵Mi dang nupui, hmeichhe kam thlum tak lakah A vêng dâwn che nia.

⁶Kan tukverh âwng kârah ka han bih a.

⁷Tlangvâl mâwl tak tak mai ka hmu hlawm a, An zînga â fâl pakhat ka en zui a,

⁸Nu pakhat awmna vêng hnaiah a kal ta a, A in lam chu a pan.

⁹Tlai lam ni tlâk hnuah khua a thim ta maw tihah,

¹⁰Nawhchizuar anga inchei hlar, Mi lêm thiam takin a lo ko va.

¹¹Zah bosal tawh, ti hawm hawm mai, Awm hle hle thei tawh lo.

¹²Kawtthlêrah te, tuallaiah te, Kil tin kil tanga tlangvâl châng ṭhîn chuan,

¹³A lo pawm a, a han fâwp a, Tlângnêl takin ti hian a han ti a:

¹⁴‘Remna thilhlan hlân tûr ka ni a, Vawiin chiah hian ka thutiam chu ka hlen ta a,

¹⁵Nangmah zawng tûr chein ka lo chhuak a ni e, Ka melh ka melh che a, ka hmu ta che a ni.

¹⁶Aigupta ram puan ṭial mawi Ka khumah ka phah diam tawh a ni.

¹⁷Mura te, Aloe te, thakthing te chuan Khum chu ka tirimtui tawh a.

¹⁸Tirawh, khawvâr hma chu nui dûn ila, Hmangaihna chu i chên dûn ang.

¹⁹Ka pasal lah ina a awm loh lai tak a ni, Ram hla takah a zin daih a.

²⁰Tangka ip a keng a, Thla vânglaiin a lo hâwng leh chauh vang,’ a ti a.

²¹A ṭawnghmang thiamin a lêm thlu a, A kam thlum tak chuan a zial â ta.

²²Bâwngpain an talhna tûr hmun a pan ang leh Thalin a thin a rawn chhun zawk hma chu, Kar hmaa sakhi a ter et et ang leh Thang lam pana sava a thlâwk ang hian, A zui lût ta a, A nun a chân phah dâwn tih rêng a hre hauh lo.

²⁴Khai le, fate u, ka thu ngaithla ula, Ka thu sawi hi ngaihven rawh u.

²⁵Nangni chuan chutiang hmeichhe lam chu hawi suh u, A kawngah chuan pêng hek suh u.

²⁶Mi tam tak chu a tichhe tawh a, Mi tam tak chuan an thih phah tawh a ni.

²⁷A in i pan vaih chuan Seol i thleng ang a, Mitthi khaw kawng pumpelh tawi ber a ni.