Read Mizo Lushai Thufingte 8 Bible Online

Thufingte 8 - Mizo Lushai bible

Thufingte 8

¹Finna chu a au a ni lâwm ni? Hriatna pawh chuan aw achhuah e.

²Kawng sîr hmun sângahte leh Kawng pêng ṭhuam laiahte chuan a ding.

³Khawpui tawntirh kulh kawngkaa, Khaw luhnaahte chuan a au chiam ṭhîn.

⁴Nangni mihringte u, in hnênah thu ka sawi a ni, Hringfate u, in hriat atân ka au a ni.

⁵Mi mâwlte u, fîmkhur zir ula, Mi â-te u, fin zir rawh u.

⁶Thu tak tak ka sawi dâwn a, ngaithla ula, Ka thu hi zawng a dik a ni.

⁷Thu dik ka chhâk chhuak a, Suahsualna hi ka ten a ni.

⁸Ka sawi apiang thu dik tak zêl a ni, Thu veivir leh thu kawi a awm lo ve.

⁹Hriatthiamna nei tân chuan a tluangtlam a, Hre zau tân pawh a chiang hle ang.

¹⁰Tangka aiin ka kaihhruaina thlang rawh u, Rangkachak thlan chhuah ai pawhin hriatna hi duh rawh u.

¹¹Lunghlu aiin finna a hlu zâwk a, Duhthusâm ber pawh hian a hen zo lo.

¹²Kei, finna hian fîmkhur ka thiam a, Hriatna neiin rem ka hre hle a ni.

¹³ LALPA ṭih dân chu sual huat hi a ni, Chapo leh intihvei, awm khawloh leh verther, Ka huatzâwng tak a ni.

¹⁴Rem ka ruat a, ka tihlawhtling bawk ṭhîn, Ka hrethiam a, thiltithei tak ka ni.

¹⁵Keimah avângin lalte an lal a, Rorêltuten dân ṭha an zam a.

¹⁶Rorêltuten ro an rêl a, Mi liante leh thuremtute pawhin.

¹⁷Min ngainate ka ngaina a, Ngun taka min zawngtuten min hmu.

¹⁸Hausakna leh zahawmna hi ka ta a ni, Hlawhtlinna leh hmuingîlna nên.

¹⁹Ka hnên aṭanga dawn tûr chu Rangkachak ṭha mi aiin a ṭha. Tangkaraw thianghlim ber ai pawhin a hlu.

²⁰Kawng dik takah ka kal ṭhîn a, Dik takin ro ka rêl ṭhîn.

²¹Mi ngainate hnênah hausakna ka pe a, An ro bâwmte ka chhûn khahsak bawk ṭhîn.

²² LALPAN min siam hmasa ber a, Thil siam a ṭan hmaa,

²³A tîr bera a siam ka ni, Khawvêl siam hma daih khân.

²⁴Tuithûkpui awm hma khân ka piang tawh a, Tuihna rêng rêng a awm hma khân.

²⁵Tlângte a din ṭan hma daih khân; Mualte a pian hma khân ka piang tawh a.

²⁶Lei leh khawmual siam hma Vaivut vei khat pawh a awm hma khân,

²⁷Vân khi a dah hmain ka awm tawh a, Tuithûkpui hual tûra kâwlkil a rin kual hma te khân.

²⁸Chung lam vân dum khi a dah ngheha, Tuithûkpui hna a siam hma khân,

²⁹Tuiin a thupêkte a pelh loh nân Tuipui chîm chin tûrte a ruat hmaa, Lei nghahna tûr a ruahman hma khân ka awm tawh a ni.

³⁰A bula awm, themthiam tak chu ka ni. Ni tin tilâwm ṭhîntu ka ni a, Kei pawh a hmaah ka hlim ṭhîn.

³¹A lei siam, a chênna tûrah Hlim takin ka lêng a, Mihringte chu ka hlimpui ṭhîn

³²Khai le, fate u, ka thu hi ngaithla teh u, Ka thu zâwmtute chu an nihlawh e.

³³Kaihhruaina zâwm ula, Fin phah rawh u, thlahthlam suh u.

³⁴Ni tin, ka kawngkhâr bula min nghâktu, Kawngka sîra min châng ṭhîna, Ka thu ngaithlatu chu a nihlawh e.

³⁵Min hmutu chu a nung ang a, LALPA duhsakna a dawng ang.

³⁶Mi hêltute chu mahni pawi khawih an ni. Min huate chuan thih an thlang tihna a ni.