Read Mizo Lushai Thufingte 9 Bible Online

Thufingte 9 - Mizo Lushai bible

Thufingte 9

¹Finna chuan in a sa a, Lung chher ban pasarih a phun.

²A lawmna tûr ran a talh a, Uain pawh a bun chhuak a, Ruai chu a peih tawh e.

³Khaw chhûng hmunsâng berahte au tûr, A chhiahhlawh nulate a tîr a.

⁴‘Mi mâwlte chu lo haw rawh se,’ tiin.

⁵‘Ti teh u, ka chaw hi ei ula, Ka uain pawh hi in teh u,

⁶Mâwlna kalsan ula, nung rawh u, Hriatna kawngah kal tawh rawh u,’ a ti.

⁷Mi induhte i zilh chuan hau i tuar ang, Mi sual i zilhhau chuan kut i tuar ang.

⁸Induhte chu zilh suh, an hua ang che, Mi fing zilh la, a ngaina hle ang che.

⁹Mi fing hnêna i sawi chu a fin phah ang, Mi dik zirtîr la, a hriatna a pung ang.

¹⁰ LALPA ṭih hi finna ṭobul a ni a, Mi Thianghlima hriat hi finvârna chu a ni

¹¹Chu chuan a tidamrei ang che a, I dam chhûng kum a tipung ang.

¹²Chu finna chu nei la, i tâna fing i ni ang a, I duh loh chuan nangman i tuar ngei ang.

¹³Hmeichhe â chu a intârlang a, Dâwn a nei lo, zah rêng a hre hek lo.

¹⁴A in kawngkaah chuan a ṭhu chhuak a, Khawpui hmun langsâr laiahte ṭhuthmun a rem a,

¹⁵Kawnga lo kal apiang a lo ko va, Veivâk apiang a lo au ṭhîn.

¹⁶‘Mi mâwlte u, lo kal teh u,’ a ti. Mi â-te hnênah chuan,

¹⁷“A rûka tui in chu a tui bîk a, A rûka chhang ei pawh a tui bîk ṭhîn,” a ti a.

¹⁸Tah chuan thihna a awm tih an hre lo, A koh luh tâkte chu Seol khurah an awm a ni.