Read Mizo Lushai Thuhriltu 1 Bible Online

Thuhriltu 1 - Mizo Lushai bible

Thuhriltu 1

¹Jerusalem lal, Davida fapa, Thuhriltu thute chu:

²Thuhriltu chuan: A va ho tehlul êm,

³Ni sa hnuaiah hah takin hna kan thawk a, Eng nge a hlâwkna awm?

⁴Chhuan khat an liam a, chhuan dang an lo awm a, Lei erawh chu a awm ngaiin a awm reng si.

⁵Ni a chhuak a, a tla leh a, A chhuahna lam a pan leh thuai a.

⁶Chhim zâwngin thli a tleh a, Hmâr zâwngin a tleh kual a, A tleh kual vêl mai mai a, A kalna ngai bawkah a lêt leh ṭhîn.

⁷Lui zawng zawng tuifinriatah a luang lût a, Tuifinriat lah a liam chuang lo, Tui chu a kîr leh a, A luanna ngai bawkah a luang leh ṭhîn.

⁸A ninawm ngei mai, sawi sên a ni lo, Thil hmuh kan kham thei lo va, Kan beng pawh a tlai thei hek lo.

⁹Thil awm tawh chu a lo awm leh ang a, Tih tawh pawh chu an ti leh ang, Vân hnuaiah thil thar rêng a awm lo ve.

¹⁰‘En teh, hei chu thil thar a ni,’ Tih tûr rêng a awm em? Hmânlai ata, kan awm hma daiha awm tawh a ni.

¹¹Tûn hma thil chu tu man an hre reng lo, Tûnlai thil lah nakina mite chuan An hre reng bawk hek lâwng.

¹²Kei, Thuhriltu hi, Jerusalem-ah Israel-te lal ka ni a.

¹³Vân hnuaia thil thlengte hi ka finna hmanga chhuia, dap chhuah ka tum ta a. Pathianin mihring buaipui tûra a pêk hi hna hrehawm tak a lo ni.

¹⁴Vân hnuaia thil tih zawng zawng hi ka hmu vek a, engkim mai hi a va ho êm! Thli man tum ang a ni.

¹⁵A kawi chu tihngîl theih a ni lo, A awm lo chu chhiar theih a ni hek lo.

¹⁶Jerusalem-a lal tawh zawng zawng aiin ka fing zâwk daih a, finna leh hriatna ka ngah zâwk ka ti rilru a.

¹⁷Finna hi hriat ka tum a, thil ho leh thil âtthlâk pawh hriat ka tum a, chu pawh chu thli man tum ang mai a ni tih ka hre ta.

¹⁸Kan fin poh leh lungkham tûr kan ngah a, kan hriat poh leh manganna tûr a tam.