Read Mizo Lushai Thuhriltu 12 Bible Online

Thuhriltu 12 - Mizo Lushai bible

Thuhriltu 12

¹I vânglai hian i siamtu chu hre reng ang che, Hun ṭha lo, tarchhiat hun, ‘Dam pawh nuam ka ti tawh lo,’ i tih hma hian.

²Chutih hunah chuan ni te, thla te, Arsi êng te i hmu ṭha thei lo vang a, Ruah sûr zawhah pawh i tân chhûm a la kiang chuang lo vang.

³I invênna, i bân chu a khûr ang a, I ke chak tak chu a la zawi ang. I hâ a bal tam avângin thil i ṭhial thei lo vang a, I mitin thil a hmu fiah hek lo vang.

⁴I beng a ngawng ang a, Kawtthlêra thâwm i hre lo vang. Buh her thâwm leh ṭingṭang ri I hre che che emaw a ni ang a, Sava hrâmah pawh i ṭhangharh ang.

⁵Hmun awih i hlau vang a, Kal pawh i zuam lo vang. I lu a ṭuak ang a, I che hrâm hrâm thei chauh vang a, Tisa châkna i nei tawh hek lo vang, I chatuan inah i kal dâwn tawh a, Khawlaiah an ṭah ang che.

⁶Tangkaraw zai chu a chat ang a, Rangkachak no chu a keh ang, Tuikhura tuibêl chu a keh ang a, Khai chhuahna hrui chu a chat ang.

⁷Vaivut chu leiah a kîr leh dâwn a, A petu Pathian hnênah thlarau pawh a kîr leh ang.

⁸Thuhriltu chuan, ‘A va ho êm! ho tak vek a lo ni,’ a ti a.

⁹Thuhriltu chu a fing hle a, a hriat chu mi a zirtîr ṭhîn a, thufing tam tak a zir a, a fiah a; thu khirhte pawh a hriat awl zâwngin a dah rem a.

¹⁰Thuhriltu chuan thu lem nuamte a zawng a, mahse a thu ziakte hi a dik a ni.

¹¹Mi fingte thu sawi chu berâmpu tiang zum, berâm khalhna ang hi a ni; thufing an lâk khâwmte pawh chu thîrkilhna khen bûr tlat anga awm reng tûr a ni, min vêngtu Pathian pêk vek a ni.

¹²Ka fapa, thil dang pakhat thlîr ngun tûr a la awm! Lehkhabu-ah engkim ziak sên a ni lo, zir tam hian a tihah lutuk ang che.

¹³Hêng zawng zawng khaikhâwmna hi i han ngaithla teh ang: Pathian ṭih la, a thupêkte zâwm rawh, chu chu mihring siam chhan a ni.

¹⁴Pathian chuan kan thiltih apiang, a chhia emaw, a ṭha emaw, a rûka kan tih chen hian a rêl dâwn a ni.