Read Mizo Lushai Thuhriltu 2 Bible Online

Thuhriltu 2 - Mizo Lushai bible

Thuhriltu 2

¹‘Nawmsip bâwlin nuam ka han tâwl teh ang,’ ka ti a. Chu pawh chu a ho khawp mai.

²Nuih hi a âtthlâk hle a, intihhlim pawh a sâwt lo hle tih ka hre ta.

³Uain nêna intihhlima nuam tâwl hi vân hnuaia mihring dam chhûng rei lo tê an hman dân tûr ṭha ber a ni law maw, a finthlâk nge thlâk loh chhin ka tum ta a.

⁴Nasa takin hna ka thawk a, in te ka sa a, grep huan te ka siam a.

⁵Huan nuam tak tak ka nei a, thei tinrêng ka phun bawk a.

⁶A châwm nân dîl ka khuap a, thing a ngaw khup mai.

⁷Bawih atân mipate leh hmeichhiate ka lei a, ka in chhûnga piang ngawt pawh an tam mai; ka hmaa Jerusalem lal zawng aiin ran leh berâm rual ka ngah a ni.

⁸Ka chhiah ram leh an lalte ro khâwl khâwm tangka leh rangkachak te chu ka lâksak a; zai thiam nula leh tlangvâl ka nei ṭeuh va, nula duhawm tak tak ka ngah bawk.

⁹Ka awm hmaa Jerusalem-a lo awmte chu ka khûm vek a ni, ka fin ka chhawr hle mai.

¹⁰Ka duh chu ka hlah ngai lo va, a nuam tûrah ka insûm ngai hek lo; ka tih apiangah ka lâwm a, ka hah man chu ka têl zêl a ni.

¹¹Ka thiltihte leh ka hahziate ka han thlîr kîr a, a lo ho mang e, thli man tum ang mai a ni, vân hnuaiah eng mah rêng hlâwk a awm lo.

¹²Finna kan tih te, âtthlâk leh mâwl kan tihte hi ka chhui ngun a. Lal meuh pawhin lal dang lo tih ṭhin bâk chu a ti thei chuang lo.

¹³Fin chu ât ai chuan a ṭha, thim ai chuan êng a ṭha zâwk tih ka hria.

¹⁴Mi fing chuan a kalna a hria a, mi â erawh chu thimah a kal ṭhîn; mahse, an pahniha chungah khawrêl thuhmun a thleng ṭhîn.

¹⁵Mi â-te chan ang bawk ka chan tho dâwn si chuan fin eng nge a sâwtna? “A sâwt hauh lo,” ka ti rilru a. Hei pawh hi ho tak a ni.

¹⁶Tu man mi â an hre reng lo ang bawk hian mi fing an hre reng chuang lo; nikhua a lo rei a, an theihnghilh mai; mi fing pawh mi â pawh kan thi vek dâwn.

¹⁷Nun hi ka ning ta, vân hnuaia thiltih apiang hi ninawm mai a lo ni, ho tak vek a ni a, thli man tum ang mai a ni.

¹⁸Ni sa hnuaia ka thawhrimna leh ka hahna hi ka kham ngei mai, ka thawh chhuah chu mi dangin an nei dâwn si a.

¹⁹A neitu tûr chu mi fing nge mi â tu ma hriat a ni lo, ka thawh chhuah zawng zawng chu a la nei dâwn si a, ka fin avânga ka deh chhuah zawng zawng chu a khâwm vek dâwn a ni. A va ho êm!

²⁰Ni sa hnuaia hah taka ka lo thawk ta kha ka inchhîr rum rum mai.

²¹Fing tak leh remhre taka mi themthiam hnathawh rah chu eng mah thawk hauh lovin a rochung hlauh si ṭhîn. Hei pawh hi ho tak, dik lo tak a ni.

²²Ni sa hnuaiah miin hah takin thawk mah se a tân a sâwt em ni?

²³A dam chhûng chu buaina leh manganna hlîrin a khat a, zânah pawh a muhîl thei lo. Hei pawh hi a va ho êm!

²⁴Duh tâwka ei leh in lo liama ṭha mihring tân a awm lo, a hah man chên rawh se. Hei pawh hi Pathian ruat a ni tih ka hre ta.

²⁵A thu lo chuan tu nge tui ti taka eia, nuam chên thei ang?

²⁶Amah tilâwmtu chu Pathianin finna te, hriatna te a pe a; thil sual titute erawh chu, Pathian tilâwmtute rochun atân thil a zawn khâwmtîr a, a chhêk khâwmtîr ṭhîn. A va ho êm, thli man tum ang mai a ni.