Read Mizo Lushai Thuhriltu 3 Bible Online

Thuhriltu 3 - Mizo Lushai bible

Thuhriltu 3

¹Vân hnuaia thil tinrêng tân hun bi ruat a ni a, Remchân hun bîk a nei ṭheuh:

²Pian hun a awm a, thih hun a awm a, Phun hun a awm a, kar leh hun a awm.

³Tihhlum hun a awm a, tihdam hun a awm, Ṭhiat hun a awm a, sak hun a awm.

⁴Ṭah hun a awm a, nuih hun a awm, Lusûn hun a awm a, lâm hun a awm.

⁵Lung paih hun a awm a, chhar khâwm hun a awm. Inpawm hun a awm a, inpawm loh hun a awm.

⁶Hmuh hun a awm a, hloh hun a awm, Khâwl khâwm hun a awm a, paih hun a awm.

⁷Pawh thlêr hun a awm a, ṭhui hun a awm. Ngawih hun a awm a, ṭawng hun a awm.

⁸Inhmangaih hun a awm a, inhuat hun a awm. Indo hun a awm a, inrem hun a awm.

⁹Rim taka thawh hi eng nge a sâwtna?

¹⁰Pathianin kan thawh tûr a ruat hi a hahthlâk hle tih ka hria.

¹¹Thil engkim tân hun ṭha a ruat a ni. Tûn hma leh tûn hnu hriatchâkna min pe a; mahse, a bul leh a tâwp thlengin Pathian thiltumte kan hre vek thei si lo.

¹²Kan dam chhûng hian hlim taka kan thawh tûr thawh hi kan tih theih tâwk a ni tih ka hre ta.

¹³Kan thawh chhuah hi kan eiin kan in ang a, kan chên tûr a ni, Pathian thilpêk a ni si a.

¹⁴Pathian thiltih rêng rêng a awm hlen dâwn tih ka hria, eng mah kan belh thei lo va, kan paih thei hek lo. Amah kan ṭih theih nân hêng hi Pathianin a ti ṭhîn a ni.

¹⁵Thil awm rêng rêng awm tawh sa a ni a, lo thleng tûr pawh thleng tawh sa vek a ni. Pathianin a ngai bawk a thlen nawntîr leh ṭhîn a ni.

¹⁶Vân hnuaia thil ka hmuh bawk chu hei hi a ni: Hleih neih lohna leh dik taka rêlna tûr hmuna sualna awm hi.

¹⁷‘Pathian chuan mi dik leh mi sual chungah ro a rêl dâwn; engkim tân hun remchâng a siam a, a tih hun pawh a ruat bawk,’ tih hi ka hmuh dân a ni.

¹⁸Ramsa ang chauh kan nih kan hriat theih nân Pathianin min fiah niin ka ngai ta bawk.

¹⁹Mihring leh ramsa chungah khawrêl thuhmun a thleng dâwn, an thi ve ve dâwn si a. An thaw thei ve ve a, mihring nih hlâwkna a awm chuang lo, engmahlo mai a ni.

²⁰An lo chhuahnaah bawk an kîr leh dâwn.

²¹Mihring thlarau chu a chho vang a, ramsa thlarau chu leiah a chhuk dâwn tih tu nge hria?

²²Kan thawh chhuah duh tâwka chen aia ṭha a awm chuang lo tih ka hre ta; chu chu kan chanpual tûr a ni: chu bâk chu thil eng nge lo thleng dâwn tu nge hre thei?