Read Mizo Lushai Thuhriltu 4 Bible Online

Thuhriltu 4 - Mizo Lushai bible

Thuhriltu 4

¹Vân hnuaiah intihduhdahna a tamzia ka hmu bawk. Tihduhdahte chu an ṭap a, tu man an thlamuan lo; a tiduhdahtute chuan thil an ti thei êm êm a; chuvângin, puitu an nei lo a ni.

²Thi tawhte chu nungdama la awmte ai chuan nihlawh zâwk hlein ka ngai.

³Chûng ai maha chan ṭha chu la piang ve lo, vân hnuaia thil ṭha lo la hmu ve hman lote hi an ni.

⁴An theih tâwka miin rim taka hna an thawh chhan pawh ka hre ta; an ṭhenawmte an awh vang a ni; hei pawh hi ho tak a ni, thli man tum ang mai a ni.

⁵Thawh peih loh vânga rilṭâma thih chu âtthlâk tak a ni tih a ni a.

⁶Thli man tum anga, ṭhûm neih tuma phili sek ai chuan hahdam taka vei khat neih a ṭha zâwk.

⁷Vân hnuaiah thil ho dang ka hmu bawk.

⁸Fa pawh nei lo, unau pawh nei lo, mahni chauhva awm si, rim taka thawk reng mai, hausa inti ngai lo a awm, a duhzâwng pawh a ei ngam lo va, tu tân nge a thawh tih pawh a ngaihtuah lo. A va hovin a va retheihthlâk thlâwn êm!

⁹Mahni maia thawh ai chuan thawhpui neih a ṭha, hlawhtlin a awl zâwk.

¹⁰Pakhat a tlûk chuan pakhatin a kaitho thei a, mahni chauhva thawk chu tlu palh sela a vânduaithlâk hle ang, kaitho tûr tu mah an awm dâwn si lo.

¹¹Pahnih chu mutnaah an innghêng lum thei, mahni chauh chuan tu nge mu lum thei ang?

¹²Pakhat hneh loh chu pahnih chuan an hneh ang. La zai thum kawp chu a chat mai lo.

¹³Naupang rethei fing tak si chu thurâwn ngaithla duh lo lal tar tawh ai chuan a ṭha.

¹⁴Chhûngkaw rethei tak aṭangin emaw, tân in aṭangin emaw a ramah chuan lalah a lo la ṭang mai thei tih a hre lo va ni.

¹⁵Vân hnuaia mihringte hi ka ngaihtuah a, an zînga naupang tuin emaw lal ai chu a la awh dâwn tih ka hria.

¹⁶Lal chu chhiar sên loh chungah lal mah sela a thih hnu chuan a chungah tu mah an lâwm chuang lo. A va ho êm! Thli man tum ang mai a ni.