Read Mizo Lushai Thuhriltu 5 Bible Online

Thuhriltu 5 - Mizo Lushai bible

Thuhriltu 5

¹Pathian ina i kalin fîmkhur ang che; mite chuan thil ṭha an ti nge ti lo tih ngaihtuah lovin thil an hlân a, chutianga tih ai chuan ngaithla tûra kal a ṭha zâwk.

²Thu thlah mai mai suh, Pathian hnêna thutiam mai chîng hek suh; vânah daih Pathian chu a awm a, nang leiah i la awm si; chuvângin, a ṭûl lo chu sawi mai mai suh.

³Lungkham i ngah poh leh mangphan tur i ngah a, thu tuitam vak pawh thu â tak tak phuh chhuahna mai a ni.

⁴Pathian hmaa thu i tiam chuan hlen hreh suh, mi â chungah a lâwm si lo; i tiam chu hlen mai rawh.

⁵Tiam zeta hlen loh ai chuan tiam loh law law a ṭha.

⁶I thutiam avângin thiam loh chang suh, ‘Pathian tirhkoh hmaah ka ṭawng sual palh a ni,’ i tih a ngai dah ang e. Engah nge i thutiam avânga Pathian a thinur anga, i thiltih a tihchhiatsak vek ang che?

⁷Mumang i ngah pawhin engah mah a ni lo, i ṭawng ṭeuh pawhin a sâwt hek lo. Pathian ṭih rawh.

⁸Ram chhûnga thuneituin retheite a nêk chêp a, dik taka ro a rêl duh hauh loh chuan mak ti lêm suh, a aia sâng zâwkin a hum a, an aia sâng lehzual humtu an awm zêl a ni.

⁹‘Mipui vântlâng tân a ni,’ an tih te, ‘Lal rawngbâwl nân a ni,’ an tihte i hria ang.

¹⁰Tangka ngaina chuan tâwk tih a nei lo; hausak châk chuan hlêp chin tâwk a nei hek lo. Hei pawh hi ho tak a ni.

¹¹Mi an hausak leh a tlântu an pung a, a hausakzia mita a hmuh mai loh chu a tân eng nge a hlâwkna awm?

¹²Ei tûr an ngah emaw, ngah lo emaw hna thawk mi chu tui takin a mu thei a; an ngah êm avângin mi hausa erawh chu rilru hahin an mu thei lo.

¹³Vân hnuaia thil pawi tak ka hmuh chu hei hi a ni: miten mamawh hun atân tiin sum an khâwl a,

¹⁴Vânduaithlâk takin peipun an tumna lamah an chân ta vek mai hi. Fa nei siin hnutchhiah tûr eng mah an nei lo.

¹⁵An nu pum ata an lo chhuak angin saruak bawkin khawvêl an chhuahsan ang - an thawhrim rah eng mah an chhawm thei dâwn si lo.

¹⁶Hei pawh hi pawi tak a ni. Kan lo kal lam ang bawkin kan kîr leh ang; kan thawhrim hi eng nge a sâwtna?

¹⁷Kan dam chhûng ni zawng zawng hi thim hnuaia khawsain bawrhsâwm mangang leh thinrim ṭeuhvin kan hmang ral ṭhîn.

¹⁸Hei hi ka thil hmuh chhuah a ni: Pathianin dam chhûng hun tawi tê min pêkah hian kan thawhrim rah chêna ei leh in hi thil ṭha ber leh âwm ber a lo ni; chu chu kan tâna khawrêl chu a ni.

¹⁹Pathianin sum leh pai min pêk kan chen theihnate hi Pathian thilpêk a ni.

²⁰Pathianin hlim theihna min pêk avâng hian kan dam chhûng tawizia kan lungkham lêm ṭhîn lo.