Read Mizo Lushai Thuhriltu 6 Bible Online

Thuhriltu 6 - Mizo Lushai bible

Thuhriltu 6

¹Vân hnuaiah hian thil ṭha lo tak, mihring tâna âwm lo zet ka hmu.

²Pathianin mi ṭhenkhat chu sum leh pai a pe ṭeuh va, an neinungin miin an ngaisâng a, an duhzâwng eng mah tlâkchham an nei lo; mahse, Pathianin chûng chu an chen zu phal si lo va! Mi dang daihin an chên hlauh zâwk ṭhîn. A va hovin a va âwm lo êm!

³Miin fa za a nei a, a dam rei hle a, a kum tam hle mah se, a duhzâwng thil ṭha kham khawp a nei lo va, phûmtu mumal pawh a nei lo; chu mi ai chuan hlamzuih pawh nihlawh zâwkah ka ngai.

⁴Hlamzuih lo piang chu sâwt lo tak a ni, thim panin a kal leh nghâl a, hming lah a nei hman hek lo.

⁵Ni êng a hmu lo va, eng mah a hre hman lo; mahse, a châwl ta mai a.

⁶Kum sâng dam nawna thil ṭha chên si lo ai chuan a chan a ṭha zâwk, an kalna tûr a inthuhmun reng si a.

⁷Mihringin rim taka hna an thawh hi an hrawk tân chauh a ni; mahse, duhtâwk an nei chuang lo.

⁸Mi fing nih hi mi â nih aiin a hlâwk em ni? Nun dân tûr a hriat avângin mi rethei tân sâwtna eng nge awm?

⁹Duhthusâm neih si loh ai chuan neih saa lungawi a ṭha zâwk. Chu pawh chu ho tak a ni, thli man tum ang mai a ni.

¹⁰Lo awm tawh phawt chu an hming vuah sa a ni; mihring awm dân tûr chu hriat sa a ni; an aia ropui chu an sawisêl thei lo.

¹¹Sawisêl chiam mah se an tân a sâwt chuang lo.

¹²Kan dam chhûng tawi tê, ho tak, hlim anga ral mai tûr tâna thil ṭha ber chu tu nge hria? Kan thih hnuah khawvêlah hian thil eng nge lo awm dâwn tih tu nge hria?