Read Mizo Lushai Thuhriltu 7 Bible Online

Thuhriltu 7 - Mizo Lushai bible

Thuhriltu 7

¹Hming ṭha hi hriak rimtui tak aiin a ṭha, Pian ni aiin thih ni.

²Zu hmuna kal aiin lusun ina kal a ṭha, La damte hi thi mai tûr kan nih hriat fo tûr a ni.

³Nuih ai chuan lungngaih a ṭha, Hmêl tingui mah se thinlung a siam ṭha ṭhîn.

⁴Mi â chuan hlimna ngawt a ngaihtuah a, Mi fing erawh chuan thih thu a ngaihtuah ṭhîn.

⁵Mi â fak nih ai chuan Mi fing zilhna ngaihthlâk a ṭha.

⁶Mi â nui chu thuka hlîng kâng puak ang lek hi a ni, Ho tak bawk a ni.

⁷Mi fingin mi bum a chîn chuan thil âtthlâk tak a ti a ni, Thamna lâkin mi a tichhia.

⁸Thil tâwpna chu a inṭanna aiin a ṭha, Dawh theih hi chapo aiin a ṭha.

⁹Thinur insûm theih hi a ṭha e, Mi â chuan a pai reng ṭhîn,

¹⁰Engtizia nge tûnlai aiin hmânlai a ṭhat zâwk? ti suh, Zawhna âtthlâk tak a ni.

¹¹Finna neih hi roluah anga ṭha a ni, Nungdamte tân hlâwk tak a ni.

¹²Tangka ang bawkin finna hian mi a hum thei a, Finna neitute a hum ṭhîn a, Chu chu hriatna hlâwkna a ni.

¹³Pathian thiltih hi ngaihtuah teh, A tihkawih tawh chu tu nge tingîl thei?

¹⁴Thil a kal tluan laiin lâwm la; buaina a lo thlenin hei hi ngaihtuah ngun rawh: hlimna leh buaina hi Pathian thlentîr a ni, thil lo thleng zêl tûr i hre thei si lo.

¹⁵Ka dam chhûng ho takah hian thil engkim ka hmu: Mi dik chu a dik avângin a thi a, mi sual chu a sual avângin a dam rei tlat bawk a.

¹⁶Fing lutukin dik lutuk suh, engah nge mahni i intihchhiat ang?

¹⁷Sual lutukin â lutuk bawk hek suh, a hun thlen hmain engah nge i thih ang?

¹⁸A eng zâwk zâwk mah hi uar lutuk suh, Pathian ṭih phawt mai la, i hlawhtling zêl ang.

¹⁹Khawpuia hotu sâwm awm ai chuan finna hi mi fing tân chuan a ṭangkai zâwk.

²⁰Leiah hian mi dik, thil ṭha tia, thil sual ti ngai hlek lo tu mah an awm lo.

²¹Mi thu sawi nazawng bengkhawn suh, i chhiahhlawhin ânchhia a lawh che i hre dah ang e;

²²nangmah ngei pawhin mi dang ânchhia i lawh ru fo ṭhîn tih i hre reng si a.

²³Finna hmangin hêng hi ka finfiah a, ‘Ka la fing ve ang,’ ka ti a; mahse, a teuh lo mai.

²⁴Thil a nih dân tak hi ka tân a thûk lutuk a, a khirh êm a, tu nge hmu chhuak phâk ang?

²⁵Tichuan, zira thil hre tûrin ka inhmang ta a, finna hi eng nge a niha, thil awm chhan bul eng nge ni? Mâwlna âtthlâkzia leh ṭhat lohzia hriat ka tum ta a.

²⁶Thil pakhat, thihna aia rapthlâk chu hmeichhe sual hi a ni tih ka chhar chhuak ta; mi a lêmna chu thang leh lên ang a ni a, mi a pawm chu khaidiata hlin ang a ni. Pathian tilâwmtu chu a lakah a him ang a, thil sual titu erawh chu a man tlat ang.

²⁷Thuhriltu chuan, ‘Thil awmzia tlêm tlêmin ka hre ta tial tial a,

²⁸ka duhthusam chu ka la hre lo na a, mi sâng zîngah mi ṭha mipa pakhat ka hmu hrâm a, hmeichhia erawh chu pakhat mah ka hmu lo.

²⁹Hei chiah hi ka hmuh chhuah chu a ni: Pathian hian mihring hi mi tluangtlam tak ni tûrin a siam a; mahse, keini hian kan intikhirhkhân zo vek a ni,’ a ti a.