Read Mizo Lushai Thuhriltu 8 Bible Online

Thuhriltu 8 - Mizo Lushai bible

Thuhriltu 8

¹Mi fing angin tu nge thil awmzia hria? Finna chuan hmêl a tihlim a, hmêl dur a tireh.

²Pathian hnêna i thutiam avângin lal thu awih rawh ka ti a che, bawhchhe mai mai suh;

³A thu thu-a thil a tih theih avângin thu dik lo a hmaah ṭan tlat suh.

⁴Lal thu chu a lal ber a, tu mah chhuahchhâl thei an awm lo.

⁵A thu i awih chuan i tuar lo vang; mi fing chuan a hun taka thil tih dân tûr dik a hre ṭhîn.

⁶Thil tinrêngin ningkhâwng an nei zêl a, mihring mawhphurhna hi a rit hle a ni.

⁷Thil lo thleng tûr hre lâwk tu mah an awm lo va, min hrilh tûr lah an awm hek lo.

⁸Tu mah mahni nunna chelh thei an awm lo, thih ni chunga thunei thei an awm hek lo. Indo laiin râlthuam dah theih a ni lo, mahni sualna laka intifihlîm thei kan awm hek lo.

⁹Hêng hi ka hmu vek a, vân hnuaia thil tih zawng zawng hi ka ngaihtuah a, ṭhenkhatin mi chungah thu an nei a, ṭhenkhatin an kut an tuar a.

¹⁰Mi sual, thlâna an phûm ka hmu a, thlân aṭanga hawte chuan thil sual a tihna khuaah chuan an fak a. A va ho êm!

¹¹Hrem tûra tih tawh an hrem lawk loh avângin sualna a pung chak a, mihring thinlung chu thil sual tih duhnain a khat a ni.

¹²Mi sual chuan thil sual vawi za ti mah se a la dam zêl mai; mahse, Pathian ṭihtute tân chuan thil a kal tluang ang tih ka hria, Pathian an ṭih si a.

¹³Mi sualte tân eng mah a tluang lo vang, an nun chu hlim ang leka tawi a ni a, an dam rei lo vang: Pathian an ṭih si lo.

¹⁴Khawvêla thil awm, thil ho tak a awm bawk: mi dikte chuan mi sualte hremna tûr an tuar hlauh va, mi sualte lahin mi dikte lâwmman dawn tûr an dawng lawi si. Ho ka va ti êm!

¹⁵Tichuan, nawmchen hi vân hnuaia thil ṭha ber niin ka ring ta tlat a ni; mihring tân ei leh ina mahni intihhlim lo liam hi thil dang ṭha a awm lo; khawvêla a dam chhûng hun atân Pathianin a ruatah rim taka thawh paha a tih theih chhun a ni.

¹⁶Fin ka tum a, khawvêl thil kalhmang hriat ka tum apiangin a chhûn a zan mut ka hmu ṭhîn lo.

¹⁷Vân hnuaia Pathian thiltih dân tinrêng hi ka hrethiam phâk lo. Hriatthiam tum chiam mah ila, kan hre thei chuang lo vang. Mi fingte chuan hriain insawi mah se, an lo hre bîk lo.