Read Mizo Lushai Thuhriltu 9 Bible Online

Thuhriltu 9 - Mizo Lushai bible

Thuhriltu 9

¹Hêng thil zawng zawng hi thliar fel tumin ka ngaihtuah chiam a, mi dikte leh mi fingte thiltih rêng rêng, mi dang an hmangaihna leh an huatna chenin, Pathian thu thu a lo ni, tu mah thil hre lâwk thei an awm lo.

²Mi tin chunga thil thleng a inang vek mai: mi dik leh mi sual, mi ṭha leh ṭha lo, mi thianghlim leh bawlhhlawh, inthawina hlân ṭhîn emaw, hlân duh lo emaw chungah khawrêl thuhmun a thleng vek a ni. Mi ṭha leh thil sual ti, chhechham ngam leh ngam lo an danglam chuang lo.

³An chunga khawrêl thuhmun thleng vek hi thil dik lo tak a ni. An dam chhûng chu mihring thinlung hi sualin a khat, an â hle a ni, rei lo têah an thi mai dâwn.

⁴Nungdama awmte zînga la awm chuan beisei tûr an la nei; sakeibaknei thi ai chuan ui nung takngial pawh a ṭha zâwk.

⁵La damte chuan thi tûr an nih an hria a, thi tawhte chuan eng mah an hre lo.

⁶Mi an hmangaihna te, an huatna te, an thîkthu te a ral vek tawh a, vân hnuaia thil tih rêng rêngah telna an nei ve tawh lo.

⁷Ti rawh, hlim takin chaw ei la, uain pawh hlim takin in rawh; i thiltihah Pathian a lâwm e.

⁸I silhfên chu fai reng sela, i lu chu hriak thih mawm rawh.

⁹He khawvêla i nun ho tak, i dam chhûng hian i nupui duh tak nên nun chên mai rawh, chu chu rim taka i thawh, khawvêla i dam chhûng ho taka i chanvo neih chhun a ni e.

¹⁰I kut thlâkna apiangah theihtâwp chhuah la, i kalna ngei tûr Seol-ah chuan thawh tûr te, ngaihtuah tûr te, hriatna te, finna te a awm dâwn tawh si lo.

¹¹Ka han thlîr kîr a, vân hnuaia thil dang ka hmuh chu hei hi a ni: intlânsiaknaa tlân chak chu a chak ber lem lo, indonaa mi huai chu hnehtu a ni kher lo; mi fingin ei tûr an ngah chuang lo, thil hria an hausa lem lo va, themthiamin duhsak an hlawh zêl bawk hek lo; tu tân pawh a hun leh khawrêl angin thil a thleng ṭhîn.

¹²Mihringin thil lo thleng tûr kan hre lo, thanga sava âwk leh lêna sangha tâng ang maiin thil ṭha lo kan chungah a thleng thut ṭhîn.

¹³Vân hnuaiah hian miin finna an thlîr dân entîrna ṭha tak ka hmu bawk, ka ngai pawimawh hle.

¹⁴Khaw tê tak tê, mi tlêm tê awmna a awm a, lal ropui takin a rawn bei a, a hual a, dai a theu hnan tlat a.

¹⁵Chu khuaah chuan mi rethei tak, fing deuh mai a awm a, a finnain khua chu a chhan chhuak ta a; mahse, chu mi chu, a retheih êm avângin tu man an hre reng lo.

¹⁶‘Finna hi tharum ai chuan a ṭha,’ ka ti a; mahse, mi rethei finna chu miin an hmusit a, tu man a thu an ngaithla duh lo.

¹⁷Mi fingin zawi tê pawha thu a sawi ngaihthlâk chu mi â zînga hotu au vak vak ngaihthlâk ai chuan a ṭha.

¹⁸Finna hi râlthuam aiin a ṭha; Mi sual pakhatin thil ṭha a tichhe tam thei hle.