Read Mizo Lushai HLA THLAN KHAWMTE 1 Bible Online

HLA THLAN KHAWMTE 1 - Mizo Lushai bible

HLA THLAN KHAWMTE 1

¹Solomona hla chhuanvâwr

²Min fâwp vawng vawng mai teh, Uain hnehin a thlum i hmangaihna,

³A tui veng veng mang e i rimte chu, I sakhming mawi chuan rimtui lêng vêl a iang e. Chuvâng alâwm nulate chuan an nêp zawh loh che.

⁴Min zai ta che, i tlân dûn ang, Ka lal ni la, i pindanah min hruai ang che, Hlimin nui hiau ila Hmangaihna uain i tlân dûn ang, Hmangaih âwm rêng i ni.

⁵Jerusalem nulate u, Ka hâng na a, ngaihno ka bei a nia, Kedar puan in angin hâng mah ila, Solomona puanzâr mawi ang ka ni.

⁶Ka han deuh avângin mi iai suh u, Ni sa ka tuar vâng mai a ni. Ka nuṭate an thinur a, Grep huan min vêntîr a, Ka intuaihnûm hman lo va ni.

⁷Min hrilh teh, aw duh tak, Khaw nge i berâmte i tlattîra, Chhûnah khaw nge i chawlhtîr ṭhin? Nangmah zawngin berâmpu dang zîngah Ka vâk ruai dâwn em ni le?

⁸Hmeichhia azawnga mawi ber, I hriat loh chuan ran rual sûlhnu chhui la, Berâmpute bûk bulah chuan I kêltête tlattîr ang che.

⁹Ka teh ber che, aw ka duh tak, Farawa tawlailîr hnûk sakawrla nên.

¹⁰I bianga bahsam uai chu a mawi mang e, I ṭhi awrhte nên chuan.

¹¹Tangkaraw phûm rangkachak khim tûr Kan siam ang che.

¹²Ka lal chu laikhumah a zâl, Ka nard rim chuan in chhûng a khat,

¹³Mura rimtui fûn ang maiin Ka duh tak chu ka ṭânglaiah a bei.

¹⁴Ka duh tak chu hena pâr bâwr ang, Engedi huana pâr vul chu.

¹⁵Ngai teh, duh tak, I va han mawi tak êm! I mit meng lah ṭhuva ang lo ni e.

¹⁶Ngai teh, duh tak, i va mawi êm! En ka nuam ngei a che. Kan zâlna chhâwl a hring nghial e,

¹⁷Kan in chung chu sidar, A thuahtu pawh fâr thing.