Read Mizo Lushai HLA THLAN KHAWMTE 2 Bible Online

HLA THLAN KHAWMTE 2 - Mizo Lushai bible

HLA THLAN KHAWMTE 2

¹Kei zawng Saron phaia tûktinpâr leh Ruama lilipâr ang chauh hi ka ni e.

²Lanu rual zîngah, ka duh tak chu Hlîng zînga lilipâr ang hi asin.

³Ka duh tak chu vâl rual zîngah, Ngaw kâr apple kûng ang hi a ni. A hlima ṭhut nuam ka ti, A rahte pawh a thlum bîk e.

⁴Uain huanah min hruai lût a, Hmangaihnain min zial.

⁵Grep chhang min barh a, A zûna uai, apple theiin min tiharh ta.

⁶A kut vei lam ka lukham a, A ding lamin min pawm.

⁷Jerusalem nulate u, Ram zukchal leh ram zukpui chhâlin Ka ngên tlat a che u, Duh tâwk a ngah hma chu kan induh lai min tho suh u.

⁸Chu! Ka duh taka aw chu, Saw, a lo kal e. Tlângah a lo tlân a, Mualah a lo zuang ṭum e.

⁹Ka duh tak chu khâm saza ang. Sakhituai ang mai hi. Bang phênah sâwn a ding ta e, Tukverhah min rawn thlîr a, Bang âwng kârah min rawn bih e.

¹⁰Ka duh tak chuan mi han bia a: Duh tak tho la, lo kal teh khai.

¹¹Thlasik a tâwp ta a, Ruahtui a hul tawh e,

¹²Phûlah pâr tin a vul ṭan a, A her chhuak e, sîrva hrâm hun, Mîmsîrikût a hrâm tâk chu Kan lo ramah.

¹³Theipui hel pawh a hmin dâwn ta, Grep pâr rim pawh a nam rem rem, Ti rawh, duh tak, tho teh, bawihte, I kal teh ang.

¹⁴I iang kher mai lungpui kâra ṭhuva biru, Khâmrâng kâra chêng chu; I sakhmêl mawi rawn inlan teh, Hriat ka nuam e, i ânka nêm.

¹⁵Sihal notê rual saw man rawh u, Sâwng tê tê sâwn kan grep pâr lai An tiṭil zo dah ang e.

¹⁶Ka duh tak chu ka ta a ni, Lilipâr zînga berâm tlattîrtu saw

¹⁷Zîng thlifîm a tleh a, Tlai khua a vâr hma hian, Rimtui tlânga saza tla leh sathâr angin, Duh tak, lo haw zên zên ta che.