Read Mizo Lushai HLA THLAN KHAWMTE 5 Bible Online

HLA THLAN KHAWMTE 5 - Mizo Lushai bible

HLA THLAN KHAWMTE 5

¹Ka thai bawihte, Ka huanah chuan ka lo kal a, Mura leh rimtui ka lâwr khâwm a, A thlâr chawpin khawizu ka ei ta a, Uain chu hnutetui nên ka in ta e. Lenrualte u, ei ula, in rawh u, Hmangaihna in ruih hnêp hma chu.

²Ka zâl na a, ka chhîng lêm lo, Chu! Ka duh tak chuan kawng a rawn kik. Duh tak, kawng min hawn rawh, Aw ka lungdi, ka ṭhûvate, ka enchim loh, Daiin ka lu a far huh a, Zân chhûmin min tihnawm zo ta.

³Ka inphelh vek tawh a, Ka inbel ṭha leh dâwn em ni? Ka ke ka sil tawh a, Ka tibawlhhlawh leh dâwn em ni?

⁴Ka duh tak chuan kawngkhâr âwngah a rawn zen a, A hnai êm a, ka zauthau zo.

⁵Kawng hawng tûrin ka han tho va, Ka kut Mura tuiah ka chiah a, Ka zungṭangah a far. A kalhna chu ka han hawng a;

⁶Ka han hawn chuan ka duh tak chu A aw hriat ka chak nên, a kal bo hman ta si. Ka zawng chiam a, ka tawng si lo, Ka au ruai a, min chhâng si lo.

⁷Khawpui vênga kal vêlte nên kan intawng a, Min vaw nek a, min hliam ta a, Vêngtute chuan ka inkhuhna min hlîmsak bawk.

⁸Jerusalem nulate u, ka ngên tlat a che u, Ka duh tak chu in hmuh hlauh chuan, A zûn ngaia ka uai thu hi, Han hrilh ngei ang che u.

⁹Hmeichhia azawnga mawi ber, I duh tak chu eng nge a duhawm bîk, Mi dang aia a ṭhat bîkna, Chuti êma min ngen tâk le?

¹⁰Ka duh tak chu a ṭha sensiar a, Sâng sâwm zîngah a ṭha chungnung e,

¹¹A sakhmêlin rangka dârtui a iang a, A lu a kir chiat a. A bahsam dum ziar e lianâk ang.

¹²A chhîngmit chuan a iang ṭhûva, luite kama fu, Hnutetuia bual hlim chu.

¹³A biang chu hlo rimtui hmun, rimtui nam reng a ni, A hmuite chu lilipâr vul, mura rim kai ang hi a ni.

¹⁴A bân chu rangkachak mûm lungmantam phûmna ang hi a ni, A sakruang chu saingho Safir lung bel ang hi a ni.

¹⁵A châwn chu alabasta lung vâr, Rangkachaka inhûng ang hi a ni. A sakhmêlin Lebanon tlâng Sidar hmunpui a iang.

¹⁶A kam a thlum ngei mai, A pumin a duhawm, Aw Jerusalem nulate u, Chutiang chu a ni, ka duh tak chu, Chutiang chu a ni, ka hmangaih chu.