Read Mizo Lushai HLA THLAN KHAWMTE 8 Bible Online

HLA THLAN KHAWMTE 8 - Mizo Lushai bible

HLA THLAN KHAWMTE 8

¹Ka nu hnute hne ve, ka nuṭa chu ni la, Tuala kan intawh khân ka fâwp chawt ngei ang che, Tu man min dem lo vang.

²Ka kai ang che a, ka nu pindan rilah, Kan hruai ang che. Tah chuan hmangaih min zirtîr ang. Uain rimtui ka hlân ang che a, Theibuhfai sâwr ka intîr bawk ang che.

³A bân vei lam chu ka lukham a, A ding lam chuan min pawm.

⁴Jerusalem nulate u, ka ngên tlat a che u, Duh tâwk a ngah hma chu Kan induh lai min tho suh u.

⁵A duh tak nên innghêng riala, Thlalêr ata lo chho saw tu nge ni? Apple buk hnuaiah ka kai harh che, Tah chuan a ni i nu’n a vei che a, A hrin tâk che.

⁶Lunglai rilah min vuan tlat la, Keimah lo chu lêng dang chhai suh, Hmangaihna hi thihna angin a chak a, Thîkthu pawh hi Seol angin chin lêm a nei lo ve, Mei alh hluah hluah ang hi a ni.

⁷Tuia leih mih rual a ni lo, Lui lian pawhin a chîm hlum zo hek lo, Hmangaihna hi miin a sum neih zawng zawngin Lei tum sela, a tân a zahthlâk ang.

⁸Farnu te tak tê kan nei a, A hnute pawh sawi tham a la ni lo, Kan farnu tân eng nge kan tihsak ang, Inlêng a neih hunah?

⁹Kulh bang ni se, Tangkaraw bang pâwng kan siamsak ang, Kawngkhâr ni se, Sidar phêkin kan tuam thuah ang.

¹⁰Kulh bang ka ni alâwm, Ka hnute pawh kulh bang pâwng ang a ni, Min han enin a lung ka tiawi tâwk na e.

¹¹Solomonan Baal-hamon hmunah Grep huan a nei. Thlawhhlawhtute a neihtîr a, Tangka sâng ṭheuh lei man an pe.

¹²Solomonan tangka sâng chu lo têl mai se, Thlawhhlawhtuten tangka zahnih pawh chu lo chang ang hmiang, Kei pawh grep huan ka nei ve bawk alâwm.

¹³Duh tak, huana awm, i aw ka lo ngaithla ang e, Ṭhiante pawhin hriat an châk e.

¹⁴Rimtui tlânga saza leh zuktuai an tla angin Duh tak, lo zuang ṭum rawh.