Read Mizo Lushai Isaia 1 Bible Online

Isaia 1 - Mizo Lushai bible

Isaia 1

¹Uzia te, Jothama te, Ahaza te leh Hezekia te Judai rama an lal laia Amoza fapa, Isaian Judai ram leh Jerusalem khaw chungchâng inlârna a hmuh chu:

² LALPAN thu a sawi e, “Vânte u, ngaithla ula, Leilung, beng lo chhi rawh: Fanaute ka châwm a, ka tiseilian a, Mahse, min helsan ta si a.

³Bâwngin a pu a hria, Sabengtungin a pu chaw pêkna thlêng a hre bawk a, Israel-te erawh hi chuan an hre lo va, Ka mite hian an hre thei lo.

⁴A! Hnam sual, khawlohnaa khat, Thlah sual, fa nikhualote tak hi aw! LALPA in kalsan a, Israel-te Mi Thianghlima chu in hnâwl ta a, In hawisan tâk daih hi.

⁵Engati nge in hel luih zêl? Vuak in la duh cheu em ni?

⁶Kephah aṭanga chhîp thlengin dam lai rêng a awm lo, Pem te, hliam te, vuak duk chur tein a khah tawh hi; Chûng chu an ṭhui lo va, an tuam lo va, Damdawi an hnawih hek lo.

⁷In ramte chu tihram a ni ta a, In khuate chu a kâng ral ta, In hmuhah ngei hnam dangte chuan in ram chu an luah ta a, In hmêlmaten an tichhe rem rum mai.

⁸Jerusalem khua chauh a la him a, an hual tlat si, Kulh nei ve lo grep huana chhâwlbûk ang leh Fanghma huana thlâm ang hi a ni.”

⁹Engkim LALPAN a dam chhun tlêm min zuahsak suh sela, Sodom khua ang khân kan ral tawh ang a, Gomora khua ang kan ni ngei ang.

¹⁰Rorêltu, Sodom khaw mi ang maite u, LALPA thu sawi hi ngaithla ula, Nangni Gomora khaw mi ang maite u, Kan Pathian Dân hi bengkhawn rawh u.

¹¹ LALPA chuan heti hian a ti: “In inthawina zozai hi ka tân eng nge a nih? In berâm pum hâlte hi ka hnê tawh a, Ran chum thau in hlante hian mi ngei mang e, Bâwng te, berâm te, kêlpa thisen te hi Ka lâwm hek lo.

¹²Ka hmaa in rawn inlan hian Tu nge hêng thil in rawn tih hi phûta, Ka tual in rawn chîl hrep ṭhin le?

¹³Thilhlan rawn la sek tawh suh u, a sâwt lo ve, In rimtui hâlte hi ka ten a ni, Thla thar te, sabat te, khâwmpui in koh chhên te, Inkhâwmpui urhsûnte ka kham ta e, Sualin a khat si a.

¹⁴In thla thar kûtte leh in ruat belh kûtte chu Ninawm ka va ti êm! Ka tân a hnawksak a, ka tuar peih tawh lo ve.

¹⁵Min ngênin ban phar mah ula, Ka maimitchhînsan ang che u, Ṭawngṭai chiam mah ula, Ka beng ka chhi lo vang,

¹⁶Insil ula, intifai zâwk rawh u, Thil sual in tih ka hmuh ṭhin hi bânsan ula, Thil sual tih chîng leh tawh suh u.

¹⁷Thil ṭha tih zir ula, a dik chu ûm rawh u, Hnehchhiahte chhan ula, Fahrahte ro dik takin rêlsak ula, Hmeithaite ṭan rawh u.”

¹⁸“Hawh u, i han sawi fel teh ang,” LALPAN a ti. “Sualin sen hlur tawh mah ula, Vûr ang maia vârin ka sil fai ang che u, Senduk tluk mah ula, Sahmul vâr ang maiin in vâr leh ang.

¹⁹Ka thu in awih zêl chuan In rama thil tui berte in ei ang a,

²⁰Mahse, in duh lohva luhlul in chhuah zêl chuan Khandaih hriama sah hlum in ni ngei ang,” tiin LALPAN thu a sawi e.

²¹Engtizia nge khawpui rinawm tak chu Nawhchizuar ang a lo nih tâk? Dik taka rorêlna, mi dikte chênna chu Tualthattute awmna a lo nih tâk hi le!

²²Nang, tangkarua chu a êkchhiaah i chang ta a, Uain kha tui i lo ni ta.

²³In hotute chu hel hmang an ni a, Rûkrûte ṭhian bul an ni; Hlêp tûr an zawng vek a, Thamna an ûm ruai ṭhîn, Fahrahte thu dik takin an rêlsak duh lo va, Hmeithaite thuin an hnên a thleng zo bawk hek lo.

²⁴Tichuan, LALPA, Engkim LALPA, Israel-te Mi Chaka thuchhuak chuan heti hian a ti: “Khawi nge, ka hmêlmate chungah ka inhrithla ang a, Mi dotute chungah phuba ka la teh ang.

²⁵I chungah ka kut ka lek ang a, Tangkarua angin ka rawh fai ang che a, A êkchhia chu ka thian fai vek ang.

²⁶Hmâna in rorêltute ang kha ka dah leh ang, In remruattute ang kha ka pe leh ang che u; Tichuan, ‘Khawpui rinawm leh dik,’ an ti leh dâwn che u nia.

²⁷Zion khua chu diknaa chhan chhuah a ni ang a, A chhûnga awm sual simte pawh felnaa chhandam an ni bawk ang.

²⁸A laka hel leh mi sualte erawh chu a vaw sawm ang a, LALPA hawisantute chu an ral vek ang.

²⁹Sasaw thing biak in uar viau kha in la zak ang, Huan serh in siamte chu in la zahpui bawk ang.

³⁰Sasaw thing thi tûr angin in vuai ang a, Tui hmu lo huan angin in ro reng ang.

³¹Mi thiltithei tak chu meibu ang hi a ni, A thiltih pawh meisi ang hi a ni, Chu chuan a timût ang a, tu man an timit lo vang.”