Read Mizo Lushai Isaia 10 Bible Online

Isaia 10 - Mizo Lushai bible

Isaia 10

¹Dân chimawm tak siama, Thupêk khirh tak tak tichhuak ṭhînte u, In chung a pik e.

²Chutin rethei ṭhat vena tûr in dang tlat a, Dik taka ro rêlsak an ni ngai lo; Hmeithaite in suam a, fahrahte in rawk ṭhîn.

³Ram hla tak aṭanga chhiatna a lo thlen hun, Thungrulhna ni-ah chuan eng nge in tih tâk ang? Tu hnênah nge ṭanpui in dîl ang a, Khawiah nge in rote in thuhrûk ang?

⁴Sala an man zîngah in tel ang a, A nih loh leh an thah zîngah in tel ve ang. Chutiang a nih pawhin LALPA thinur a reh lo va, A kut a la lek cheu a ni.

⁵A! Asuria lal chu ka thinur talhtum a ni, Ka thinrim hrîk thlâk nân ka tiang a ni.

⁶Pathian pawisa lo hnam bei tûrin ka tîr a, Min tithinurtute nuai nek tûrin thu ka pe a, Anni chu va suama, va rawk tûr leh Kawtthlêr chirhdiak anga chîl hrep tûrin.

⁷Chu mai chu a lo duh tâwk lo va, Hnam dangte chu tihmang a lo tum a, Chin lêm nei hlek lova râwt vek a lo rilrûk a ni.

⁸“Ka miliante hi lal tluk ṭhalh an ni a,

⁹Karkhemis khua angin Kalno khua pawh ka hneh a ni lâwm ni? Hamath khua angin Arpad khua pawh? Samari khua chu Damaska khua angin ka sawisak kha.

¹⁰Milem biakna ramah ka kut ka lek zêl a, Samari khua leh Jerusalem khua aia milem tamnaah chuan.

¹¹Samari khua leh an milem biakte chu ka tichhe vek tawh a, Jerusalem khua leh an milem biakte pawh ka sawisa lo vang maw?” a ti vei a.

¹² LALPA chuan heti hian a ti: “Zion tlâng leh Jerusalem khaw chunga thil tih ka tum chu ka tih zawh hun chuan Asuria chu a chapo leh a inchhuan êm avângin ka hrem dâwn a ni.” Asuria lal chuan:

¹³“Ka chak avâng leh ka fin thiam avângin Keimah ngeiin ka tih a ni. Hnam tin ramri ka sawn kual a, An ro khâwlte ka chhuhsak a, Bâwng kawlh angin lalte ka chîl nek a.

¹⁴Sava awm loh hlâna a tui an la ang hian, Ram tinrênga kalin an buzâwl chu Ka zensak a, an rote chu ka la zêl a, Thla min khawn khum an awm lo va, Min khak ngam rêng an awm lo ve,” a ti.

¹⁵Hrei hi a chêktu aiin a ropui zâwk em ni? Thingzaina pawh a hrûttute aiin a ṭangkai zâwk em ni? Talhtum pawh hian a lektu chu a lek thei em ni? Talhfiak pawhin a kengtu chu a lek thei lo.

¹⁶ LALPA, Engkim LALPA ngei chuan, Mi thau tak takte chu chêr hri a veitîr ang a, Mei angin an kawchhûng chu a lum vut vut bawk ang.

¹⁷Israel-te êntu chu meiah a chang ang a, Mi Thianghlima chu meialhah a chang ang. Ni khat thilah engkim a kâng ral ang a, Hlohar leh hnimhlîngnei lam a kâng fai ang.

¹⁸A ngawpui leh ram ṭha hlutna chu A chhe vek dâwn a ni; Ngawrte an râwp ral ang mai hian.

¹⁹Ngaw thing la ding pheuh pheuhte chu Naupang chhiar tham lek a ni ang.

²⁰Chumi hun chuan Israel la dam chhunte leh Jakoba thlah thi bâng la awmte chuan anmahni sawisatu an rin chhan tawh lo vang a, LALPA, Israel Mi Thianghlima chu an ring takmeuh tawh ang.

²¹Jakoba thlah thi bâng la awm chhun chu an Pathian chak tak hnênah chuan an lo kîr leh ang.

²²Israel mite chu tuifinriat kama ṭiau zâtin tam mah sela, tlêm tê chauh an lo kîr leh ang: boral tûra ruat an ni a, an phu rêng si a.

²³Engkim LALPA, Pathian chuan a ruat tawh angin ram pumah chhiatna a thlentîr dâwn a ni.

²⁴Chuvângin, Engkim LALPA, Pathian chuan heti hian a ti: “Zion-a chêng, ka mite u, Aigupta mite tih angin Asuria chuan tiang lekin vua che u mah sela, hlau suh u.

²⁵Rei lo tê-ah, in chunga ka thinur chu a reh ang a, an chungah ka ṭuan thung ang.

²⁶“Engkim LALPA chuan Horeb lungpui hmuna Midian mite chunga a tih ang khân an chungah pawh a vuakfung chu a lek ang a, tuipuia Aigupta mite a tih ang khân Asuria chu a vaw hrep ang.

²⁷“Chumi hun chuan Asuria thuhnuaia in kûn chu ka chhuah ang che u a, in nghâwng ata a nghâwngkawl chu ka titliak ang,” a ti.

²⁸Aiath khua an lo thleng ta, Migron khua pawh an rawn pêl a, Mikmas khuaah an rawn inchhêk ta e.

²⁹Kalkhân an pêl tawh a, Geba khuaah an riak ta e, Rama khaw mite chu hlauvin an khûr. Lal Saula khua Gibea mite an tlânchhia e.

³⁰Galim khaw mite u, hlauvin au vak ula, Laisa khaw mite u, ngaithla ula, Anathoth mite u, lo chhâwn rawh u.

³¹Madmena mite chu an tlânchhia a, Gebim khuaa chêngte chu biru tûrin an tlân.

³²Vawiin hian Nob khuaah chuan a ding ta a, Zion tlâng, Jerusalem khua chu kuttum a thin khum e.

³³Ngai teh, LALPA, Engkim LALPA chuan Thingzâr thlâk ang maiin a thlâk duai duai ang a, A sâng sâng chu a râwt ang a, A titlâwm ang.

³⁴Hreiin ngawpui an ṭhiat a, Lebanon tlânga thing lian pui pui an kit ang hian Asuria chu a kit ve ang.