Read Mizo Lushai Isaia 11 Bible Online

Isaia 11 - Mizo Lushai bible

Isaia 11

¹Thing kih bul chu a lo chawr leh ṭhîn ang hian, Jesaia thlah aṭangin lal thar a lo chhuak ang.

² LALPAN a thlarauvin a awmpui ang a, Finna leh hriatthiamna te, Remruat thiamna leh huaisenna te, LALPA ṭihna leh hriat theihna thlarau te a neihtîr ang.

³ LALPA ṭih hi a lawmzâwng tak a ni ang a, A lan dân ang maiin ro a rêl lo vang a, Benga a hriat satliah aṭang maiin thu a pawtchat hek lo vang.

⁴Retheite chu dik takin ro a rêlsak ang a, Ram chhûnga mi tlâwmte pawh a chawikâng ang. A thu, a talhtum chuan lei hi a vua ang a, Mi sualte chu a chhêm hlum ang.

⁵Dikna a taihrênah a hmang ang a, Rinawmna chuan a kâwng a hrêng bawk ang.

⁶Chinghniate chu berâm zîngah an tla ang a, Keitê leh kêl pawh an bawk dûn ang. Bâwng no leh sakeibaknei no chu Ran châwm thau nên an awm ho vang a, Naupang têin a hruai duah duah ang.

⁷Bâwngpui leh savawm chu an tla dûn ang a, An note pawh an bawk za dial dial ang. Sakeibakneite chuan bâwng ang maiin buhpâwl an ei tawh ang.

⁸Hnute hne laite chu chawngkawr kaw bulah an tualchai ang. Hnute hnêk bâng hlimten rûlngân tawmkûkah kut an dah ang.

⁹Ka tlâng thianghlimah rêng rêng chuan Tu mah an intina tawh lo vang a, An intichhe hek lo vang; Tuifinriat hi tuia a khat angin, LALPA an hriatna chuan ram hi a khat tawh dâwn si a.

¹⁰Chumi hun chuan Jesaia thlah aṭanga lal lo chhuak chu hnam tin tân chhinchhiahna a ni ang a, a chawlhhmun chu an rawn pan ang a, an chawimawi ang.

¹¹Chumi ni chuan LALPAN a bân a phar leh ang a, ama mite thi bâng, Asuria leh Aigupta ram te, Pathros ram te, Sudan ram te, Elam ram te, Babulon ram te, Hamath ram te, tuifinriat kam leh thliarkâra la awmte chu a hruai kîr ang.

¹²Hnam tinrêng hmuhah puanzâr a zâr ang a, Israel hnam hnawh darhte leh Juda tlân darhte chu Kâwlkil li aṭangin a hruai khâwm ang.

¹³Efraim thîkthuchhiatna a reh ang a, Juda dotute chu an bo tawh ang. Efraim chuan Juda chu a thîk tawh lo vang a, Juda lahin Efraim chu a tibuai hek lo vang.

¹⁴Khawthlanga awm Filistia chu an beih rawn ang a, Khawchhak lam mite pawh an rawk ho vang.

¹⁵ LALPAN Suez litengsâwl chu a tikang ang a, Eufretis luipui pawh thli lum hmangin a kangchahtîr ang a, Lui tê pasarihah a chantîr ang a, Kephah pawh huh lovin an kai thei ang.

¹⁶Aigupta ram ata Israel-te an lo chhuahna tûr Lamlian a awm ang khân, A mi la bângte tân Asuria ram aṭang pawhin Lamlian a awm ruah ang.