Read Mizo Lushai Isaia 13 Bible Online

Isaia 13 - Mizo Lushai bible

Isaia 13

¹Babulon chungthu Amoza fapa Isaian a dawn chu:

²Tlâng kawlh chhîpah puanzâr târ ula, Sipaite chu au khâwm ula, Khaw chapo tak kulh kawngkhâr chu Bei tûrin in kutin hawi rawh u.

³Keimah ngeiin ka mi ruatte thu ka pe a, Ka mi chhuanawm, huaisen tak takte chu, Ka thinur hrîkthlâk nân ka ko va ni.

⁴Tlânga ri mur mur chu ngaithla teh u, Ram tin ata hnam tinrêng lo kal khâwm, Thâwm ri a nih chu; Engkim LALPAN a sipaite râl bei tûrin a khâwm a ni.

⁵Kâwlkil ata an lo kal a, Vân tâwp ata an lo pung khâwm a ni, LALPAN a thinur hriamhreiin ram pum pui chu a tichhe dâwn a ni.

⁶Chiau vawng vawng rawh u, LALPA ni chu a lo hnai ta, Engkimtitheia chuan chhiatna a thlentîr dâwn a ni.

⁷Chuvângin, mi zawng zawng bân a zâwi ang a, An zâm vek ang.

⁸Thlaphâng takin hrehawm leh na an tuar ang a, Nau vei angin an vial an vial bawk ang; An zâm hmêl chu an inhmuhin an zak hle ang.

⁹ LALPA ni chu a lo thleng dâwn, A thinur râpthlâk tak a lo lan hunah chuan, Ram chu tihṭiau a ni ang a, A chhûnga awm mi sualte chu an boral ang.

¹⁰Vân arsi leh chhohreivûngte khi An êng a reh tawh ang. Ni chhuak hlim pawh a thim ang a, Thla pawh a êng tawh lo vang.

¹¹Lei hi a sual avângin ka sawisa ang a, Mi sualte pawh an sual avângin ka hrem bawk ang; Mi chapote inchhuanna chu ka titâwp ang a, Mi nunrâwng leh induhte chu ka titlâwm ang.

¹²Rangkachak hlu a vâng angin thi bâng an vâng ang a, Ofir rangkachak a tlêm angin mihring ka titlêm ang.

¹³A thinur ni a thlen hun chuan Engkim LALPAN vân khi a tikhûr ang. Lei pawh a sawi ang a, A awmna hmun ata a per chhuak ang.

¹⁴Sakhi tlânchhia leh berâm vên loh an darh angin, Mahni mite an pan ang a, Mahni ramah an tlân haw zut zut ang.

¹⁵An hmuh apiang an vit ang a, An man apiang khandaihin an that ang.

¹⁶An nausênte an mit hmuhah an vuak hlumsak ang a, An inte pawh an ramsak ang a, An nupuite an pâwngsualsak bawk ang.

¹⁷Babulon bei tûrin Media mite ka chawk tho va, Tangka an awt lo va, Rangkachaka tham theih an ni hek lo.

¹⁸An thalin tlangvâlte an kâp hlum ang a, Nausên an lainat lo vang a, Naupang pawh an khawngaih hek lo vang.

¹⁹Lal ram khuaa ropui ber, Babulon khaw mawi tak, Kaldai-ho chhuan êm êm chu LALPAN a titlâwm ang, Sodom leh Gomora khua ang khân.

²⁰Tu mah an chêng tawh lo vang a, Ṭhang lo thar zêl mah se tu mah an pêm lût lo vang. Arab zin vêlte chuan puan in an zâr lo vang a, Berâmpu tu mahin an berâmte an chawlhpui hek lo vang.

²¹Thlalêr ramsa an chêng ang a, Chhimbukin bu a chhep bawk ang. Chingpirinute an awm ang a, In chim bângah sathâr an tualchai ang.

²²Kulh bîngahte chuan sihal an û ang a, Lal in nuamahte chuan chinghnia an hrâm bawk ang. Babulon chhiat hun chu a lo thleng dâwn, A nite chu a ral ṭêp tawh a ni.