Read Mizo Lushai Isaia 14 Bible Online

Isaia 14 - Mizo Lushai bible

Isaia 14

¹ LALPA chuan Jakoba chungah ngil a nei ang a, a mi Israela chu a thlang leh ang. An ramah chuan a awmtîr leh ang a, hnam dang pawhin an rawn pan ang a, Jakoba chhûngte chu an rawn bêl ang.

²LALPAN a pêk rama haw tûrin hnam dangten an hruai ang a, Israel-te chuan LALPA ramah chûng mite chu, a hmei a pa, bawihah an nei ang a, anmahni mantute chu an man ve thung ang a, awpbettute pawh chu an awp thung ang.

³Na in tuar te, in mangannate leh rim taka an chhawr luih che u lak ata LALPAN a hahchawlhtîr hunah che u chuan,

⁴He cheksawlhna hla hian Babulon chu in au khum dâwn nia: Tiduhdahtua chu a tlâwm ta elo? Hlauhawma kha a va reh ta êm!

⁵ LALPAN mi sualte tiang a titliak a, Lal sualte vuakfung chu a tibung ta.

⁶A thinrim a, mite a hlap nek ṭhîn, A tihtlâwm tawhte pawh thinrim takin sawisak a bâng chuang lo.

⁷Ram tin thlamuang takin an awm ta hiai hiai a, Lâwm hla sa-in an au chûl mai.

⁸Nangmah vângin fâr thingte chu an lâwm ta e, Lebanon tlâng sidarte chuan, “I tlâwm tâk hnu hi chuan min kit tûr pawh lo kal an awm ta lo,” an ti.

⁹Hnuai lam mitthi khua chu hmuak tûr chein A lo buai êm êm a, I zuk thlen hlân a nghâkhlel hle a ni. Hnam tinrêng lalte leh hruaitute thlarau chu an lalṭhutthlêng Ata a kaitho chung mai a.

¹⁰An zavaiin an lo hmuak ang che a, “Keiniho ang maiin i chau ta a, Keini ang lek i nih tâk hi:

¹¹I ropuina mitthi khuaah i rawn chhukpui ta a, I ṭingṭang thâwm rimawite nên, I âwngphah chu changpât a ni ta a, Thil lung puanah i sin tâk hi,” tiin.

¹²Aw nang, Babulon lal, “Zîng êng, Vârparh Arsi inti,” Vân aṭangin i va tlahniam ta êm! Hnam dang titlâwm ṭhîntu Tihtlâwm i nih ve tâk hi:

¹³“Vânah ka lâwn ang a, Pathian arsi chung lamah khian hmâr tâwpa Pathian tlângah lalṭhutthlêng ka hûng ang,

¹⁴Chhûm chung lamah ka han chho zêl ang a, Chungnungbera tlukah ka insiam ang,” i ti vei a.

¹⁵Mitthi khuaah an namthla ta a che, A khuar thûk laiah chuan.

¹⁶A hmu che chuan an en vawng vawng ang che a, ‘He mi hi maw lei pum tinghînga, Lalram sâwi nghîng ṭhîntu.

¹⁷Thlalêr anga ram tin tiṭiauva, Khawpui kulh neite la ṭhîntu chu? A sal mante chhuah ngai lova, Hâwntîr duh lotu chu?’ tiin I chanchin an chhui ang.

¹⁸Hnam dang lal zawng zawngte, Ropui takin mahni thlânah an zalh ṭhîn a,

¹⁹Nang erawh chuan phûm i hlawh lo vang a, I ruang chu nausên thisâwn angin tualah an paih ang a, Khuarkhurumah an paih ang a, an chîl nek ang, Mi dang ruangte chuan a delh bawk ang.

²⁰I ram i tichhe hneh hle a, I mite pawh i thah avângin Lal dang anga phûm ve i ni lo vang, Mi sualte thlah hming chu bo hlen rawh se.

²¹An pate sual avângin an fate chu that zêl ula, An zînga mi tu mah lal tawh suh se, Leiah hian khawpuite an din leh dah ang e.

²²Engkim LALPA thuchhuak chuan heti hian a ti: “Babulon chu ka bei ang a, A hming ka tibo daih ang a, Eng mah ka zuah lo vang. A tu leh fa chenin ka tiboral vek ang,” LALPA thuchhuak chuan a ti.

²³“Ka phiat chhe vek ang a, Sakuh chênna hmun leh chirhdûmah ka siam ang,” Engkim LALPA thuchhuak chuan a ti.

²⁴Engkim LALPAN hming chhâl meuhvin heti hian a ti: “Tih ka tum chu ka ti ang a, Rem ka ruat chu a tlang bawk ang.

²⁵Asuria chu ka ram chhûngah ka lo titlâwm ang a, Ka tlângahte chuan ka chîl nek ang. A nghâwngkawl chu ka mite nghâwng ata ka hlîp ang a, Thil rit tak tak a phurhtîr ṭhinte chu ka la bo vang.

²⁶Khawvêl pum tân hei hi ka tih tum chu a ni, Hnam tinrêng chungah ka kut ka lek tâk hi.”

²⁷Engkim LALPAN tih a tum ta, Tu nge sûtsak thei ang? Hrem tûrin kut a lek ta a, Tu nge lo dang thei ang?

²⁸Lal Ahaza thih kumin he thu hi a lo thleng a:

²⁹Filistia mite u, An vuakna che u tiang a tliak ta a, hlim mai suh u, Rûl chu thi mah sela chawngkawr a lo chhuak ang, A tui aṭangte chuan rûlpui thlâwk thei a lo keu vang.

³⁰ LALPAN a mi, rethei chanhaite chu a châwm ang a, Mangangte chu thlamuang takin an hahchâwl ang. Nangni erawh chu ṭâmin in fate ka tihlum ang a, Thi bângte chu ka sât hlum ang.

³¹Filistia rama khaw tin hotute u, Chiau vawng vawng ula, In vaiin hlau hle rawh u. Hmâr lam aṭangin vaivut a lo khu e, Chau fâl awm lo sipai rual pal khûk chu.

³²Filistia ram palaite chu Engtin nge kan chhân ang? “Zion chu LALPA din a ni a, Tah chuan tihduhdah tuar, a mite chu an tlu lût ang,” Tiin a ni ang chu.