Read Mizo Lushai Isaia 15 Bible Online

Isaia 15 - Mizo Lushai bible

Isaia 15

¹Moab chungthu: Zan khat thilah Ar khua sawisak nek a ni a, Moab a tlâwm ta e. Zan khat thilah Kir khua sawisak nek a ni a, Moab a tlâwm ta e.

²Dibon mite, an pathian biakna hmunsângah Ṭap tûrin an chho va, Moab miten an lu an mêt kawlh a, Khabehmul an ziat fai a, Nebo leh Medeba khua chu an ṭah vawng vawng a ni.

³Kawtthlêrahte saiip puan an veng a, In chung zâwlahte leh tual zau laiah te, Lungchhe takin an ṭap tlawk tlawk mai a.

⁴Hesbon leh Elealeh mite thlabârin an au va, Jahaz aṭang pawhin an hre phâk hial a ni. Moab sipaite pawh thlaphâng takin an au va, An zâm zo ta.

⁵Moab vângin ka thinlung a na a, Zoar leh Eglath-selisia thleng thlengin An râl hlau chu an tlânchhia a, Ṭhenkhatte chu Luhit chhovah ṭap chungin an chho va, Ṭhenkhat phei chu Honoraim-ah an tlân a, Mangang takin an ṭap zêl a,

⁶Nimrim lui a kang ta a, A kam hnimte a uai zo ta. Chawrno leh tûr a awm lo va, Hnimhring rêng rêng a awm ta lo.

⁷Tuipuisuthlah ruam pêlin An neih zawng zawng an tlânchhiatpui.

⁸Moab ram kil tinah an au chuah chuah mai a, An au thâwm chuan Eglaim a thleng hial a, Beer-elim aṭang pawhin an ṭap thâwm chu an hria.

⁹Dibon khaw tuite chu thisenin a sen khuih mai, Chûng aia râpthlâk chu a la awm dâwn, Moab ram aṭanga râltlânte leh Ram chhûnga thi bângte tân sakeibaknei ka tîr ang.