Read Mizo Lushai Isaia 17 Bible Online

Isaia 17 - Mizo Lushai bible

Isaia 17

¹Damaska chungthu: “Damaska chu khua pawh a ni tawh lo vang, Thil chhe awm khâwm mai a ni ang.

²Aroer khuate chu an rauhsan vek ang a, Ran rual tlatna hmun a ni ang. Thlamuang takin an bawk ang a, Tu man an hnawt lo vang.

³Efraim ramah kulh rêng a awm lo vang a, Damaska ram pawh a ṭiau vek ang, Suria rama la dam chhunte chu Israel-te ropuina chuai ta ang an ni ang,” Engkim LALPA thuchhuak chuan a ti.

⁴“Chumi ni chuan Jakoba ropuina a ral ang a, A hausa a, mahse, a pachhe hle tawh dâwn a ni.

⁵Buh sengtuin Refaim phai buh an seng zawha, Lâk hmaih la awm pheuh pheuh ang hi an la ni ang.

⁶Oliv rah sâwi ṭilh tawh, A lêr sânga pahnih khat rah veu veu, A zâr sei deuh hmâwra pali panga la awm ang hi an la ni ang,” Israel-te Pathian, LALPA thuchhuak chuan a ti.

⁷Chutih hunah chuan miten anmahni siamtu lam an hawi ang a, Israel Mi Thianghlima chu an thlîr ang.

⁸Kuta an siam maichâmte chu an ngaihsak lo vang a, anmahni siam Aseri-te leh rimtui hâlna maichâmte chu an melh duh tawh lo vang.

⁹Israel-te hmaa Hiv mite leh Amor mite khawpui rauhsan ang mai khân an khawpui kulh ṭha tak takte chu an tlânsan ang a, a ram hun a lo thleng ang.

¹⁰In chhandamtu Pathian chu in theihnghilh a, In himna lungpui chu in hre duh ta si lo. Mawi tak takin huan serh in siam zâwk a, Hnam dang pathian biak chu in thlang ta a.

¹¹In phun tûk lawkah chuan In thil phunte nungin pâr mah sela, A rah lawh tûr a awm hauh lo vang, Buai leh na reh thei lo a lo thlen ni-ah chuan.

¹²Chei! Tuifinriat fâwn angin Hnam liante chu an lo ri hum hum a, Tuifâwn buan buan angin An che buan buan a ni.

¹³Chûng mite chu lo fâwn buan buan mah se, LALPAN a hau vang a, an reh duak ang, Tlângah thliin buhsi a chhêm lên leh, Thlipui chhêm lên vaivut ang hian an bo duak ang.

¹⁴Tlai lamah chuan an hlauhawm êm êm a, Zîng lamah chuan hlauh tûr an awm ta lo, Chu chu min rawk tumtu, min ram tumte chanvo tûr chu a ni.