Read Mizo Lushai Isaia 18 Bible Online

Isaia 18 - Mizo Lushai bible

Isaia 18

¹Ethiopia lui râlah, thlâwk sup sup tamna ram a awm.

²Chûng mite chuan Nail luidung rawn hrûtin, Phairuang lawnglêng hmangin palai an rawn tîr chhuak, “In ramah kîr rawh u, palai viak ṭhate u, Hnam chak leh thiltithei tak, Mi dawlhkai ṭha, sa mâm thel thawl, Hmânlai ata mi tin hlauhte awmna, Lui tam tak luan tlangna ramah chuan.”

³Khawvêla awm zawng zawng, leilung luahtute u, Tlângchhîpa puanzâr an zâr lo thlîr ula, Tawtawrâwt ri lo ngaithla ang che u.

⁴ LALPA chuan heti hian ka hnênah a ti: Buh seng, khaw lum lai dai tla ang leh, Chhûn lai ni sa ang hian, Ngawi rengin ka awmna aṭang hian ka rawn thlîr ang.

⁵Grep pâr a han rêm a, a lo rah a, Mahse, a hmin lawh tûr a awm hmaa sâm ang maiin, Hmêlmaten Ethiopia mite chu an rawn sâm ang.

⁶An ruangte chu tlângrama mu leh ramsa eiah an hnutchhiah ang, Nipui laiin mu rualin an tlân ang a, Thlasik laiin ramsate chuan an tlân thung ang.

⁷Hnam chak leh thiltithei tak, Mi dawlhkai ṭha, sa mâm thel thawl, Hmânlai ata mi tin hlauhte awmna, Lui tam tak luan tlangna ram aṭangin Engkim LALPA hming chawia sak, A chênna tlâng Zion-ah chuan Thilpêk kengin an lo kal ang.