Read Mizo Lushai Isaia 19 Bible Online

Isaia 19 - Mizo Lushai bible

Isaia 19

¹Aigupta ram chungthu: Chhûm chak tak chunga chuangin LALPA chuan Aigupta ram a pan. A hmaah chuan Aigupta ram milemte chu an khûr ang a, Aigupta mite chu an zâm zo vang.

²“Aigupta mite chu, Aigupta mite vêk ka beihtîr ang a, Unau an inbitum ang a, ṭhenawm an inbei ang. Khua leh khua te, bial leh bialte an indo vang.

³Aigupta mite chu ka tizâm vek ang a, An remruat sate chu ka tichingpen vek ang. Milem te, dawithiam te, mitthi thlûk thiam te, Aien thiamte an râwn chung ang.

⁴Aigupta mite chu hotu râwng tak kutah ka pe ang a, Lal sual takin an chungah ro a rêl ang,” LALPA, Engkim LALPA thuchhuak chuan a ti.

⁵Nail luipui chu a kang ang a, Li mawngte pawh a ro vek ang.

⁶Lui pêngte leh an tui kawngte a kang ang a, A uih vut vut bawk ang, Phairuang leh pumphîrte chu a vuai zo vang.

⁷Luipui kam chu a kawlh rel rul ang a, Thil phunte pawh a thi ang a, Thliin a lên bo vang.

⁸Sanghamantute chu rûmin an ṭap ang a, Nail luia nghakuai chiahte leh lên dêng ṭhînte chu An hlawhchham ang.

⁹La zai sîn kaia khuihtute chu an buai ang a, Puan zai sîn tah thiamte pawh an mangang ang.

¹⁰Puantah thiamte chu an chau vang a, Inhlawhfate an lungngai ang.

¹¹Zoan khaw hruaitute chu an va â êm! Farawa mi fingte remruat pawh â tak a ni; ‘Hmânlai mi fingte leh lalte thu dawng chhâwngtu kan ni,’ tiin. Engtin nge Farawa hnênah an sawi theih ang?

¹²Khawi lamah nge i mi fingte an awm? Aigupta tân Engkim LALPA thil tih tum hi, Sawi fiah sela, hrilh che rawh se.

¹³Zoan khaw hruaitute chu mi â an ni, Nof khaw hotute pawh bum an ni. An hruaituten an hruai bo ta.

¹⁴ LALPAN an rilru ngaihtuahna a tichiai ta a, Aigupta mite chuan eng mah tihdik theih an nei lo; An pai an pai ta a, Zu rui ama luaka a tlu ang hi an ni.

¹⁵Milian leh mitê, hausa leh rethei, Tu mah Aigupta ram tân tih theih nei an awm lo.

¹⁶Chumi hun chuan Aigupta mite chu hmeichhia ang maia dawih an la ni ang; Engkim LALPAN anmahni hrem tûra kut a han lek chuan hlauvin an khûr zawih zawih ang.

¹⁷Engkim LALPAN Aigupta a hrem dân tûr a puahchah chu sawi rîk hlek an hriat pawhin Judai ram chu an hlau êm êm ang.

¹⁸Chumi hun chuan Aigupta ram khaw ngaah Hebrai ṭawng an hmang ang a, Engkim LALPA hming chhâlin thu an tiam ṭhîn ang. Chûng khaw zînga pakhat chu, ‘Haheres’ an vuah ang.

¹⁹Chumi hun chuan Aigupta ram chhûngah LALPA tân maichâm an siam ang a, Aigupta ramriah a tân lungphun a ding bawk ang.

²⁰Chûng chu Aigupta ramah Engkim LALPA a awm tih hriat nân leh chhinchhiah nân a ni; tihduhdah an niha, LALPA an auh veleh chhantu tûr tîrin a hum ang a, a chhan chhuak ang.

²¹LALPA chu Aigupta mite hnênah a inlan ang a, hâlral thilhlante leh inthawinate hlânin chibai an bûk ang a, LALPA hnênah thute an tiam ang a, an hlen bawk ang.

²²LALPA chuan Aigupta mite chu a hrem ang a; mahse, a tidam leh nghâl bawk ang. LALPA lam an hawi ang a, an ṭawngṭainate a chhâng ang a, a tidam tawh ang.

²³Chumi hun chuan Aigupta ram aṭangin Asuria ram thlengin lamlian a kal ruah ang a, Asuria leh Aigupta mite chu an intlawh tawn chhên tawh ang. Pathian chibai an bûk tlâng bawk ang.

²⁴Chumi hun chuan Israel chu Asuria leh Aigupta tlukpui a ni ang a, chûng hnam thumte chu khawvêl tân malsâwmna an ni ang.

²⁵Engkim LALPA chuan mal a sâwm ang a, “Ka mi, Aigupta mite, ka kut chhuak, nangni Asuria mite, ka thlan, nangni Israel mite u, mal ka sâwm ang che u,” a la ti ang.