Read Mizo Lushai Isaia 20 Bible Online

Isaia 20 - Mizo Lushai bible

Isaia 20

¹Asuria lal Sargona thupêk angin an sipai hotu ber chuan Filistia mite khua Asdod chu a bei a, a la ta a.

²Hemi hma kum thum kal ta khân Amoza fapa Isaia chu a pheikhawk phelha, a saiip puan ven chu hlîp tûrin LALPAN thu a pe a, chutiang chuan a ti a; saruakin, pheikhawk pawh bun lovin a awm ta a.

³Asdod khua an lâk kum chuan LALPAN, “Ka chhiahhlawh Isaia chu kum thum chhûng pheikhawk bun lo leh saruakin a awm a, hei hi Aigupta leh Ethiopia chungchâng chhinchhiahna leh entîrna a ni ang.

⁴Hetiang hian Asuria lal chuan Aigupta mi an mante leh Ethiopia mi sala an hruaite chu, naupang pawh, upa pawh, saruak leh pheikhawk bun lovin mawngtam lang rengin an kawi duah duah ang. Aigupta ram an mualpho hle dâwn a ni.

⁵Ethiopia lo ring viau va, Aigupta lo chhuang ṭhînte chu beidawngin an mangang hle ang.

⁶Chumi hun a lo thlen chuan hêng tuipui kama chêngte hian, “Kan lo rin viau, Asuria lal laka min chhan tûr leh min hum tûra kan lo belhte heti mai hi an nih tâk hi! Keini tehlul hi mahni maiin engtin nge kan inhum theih ang?” an ti ang.