Read Mizo Lushai Isaia 21 Bible Online

Isaia 21 - Mizo Lushai bible

Isaia 21

¹Babulon chungthu: Ṭhâwngaleivirin thlalêra hrût angin, Ram hlauhawm tak aṭangin chhiatna a lo thleng dâwn.

²Zêl râpthlâk tak mi hmuhtîr a, Rawktuin a rawn rawk bawrh bawrh a, Suamtuin a rawn suam buan buan a. Elam sipaite u, bawh ta che u, Media sipaite u, kulhte chu bei rawh u, Mi dang tithlabârtu chu ka timang dâwn a ni.

³Chumi avâng chuan ka khûr a, Nauvei na ang maiin ka kâwngte a na a, Ka kûn reng a, eng mah ka hre thei lo, Min râp êm a, eng mah ka hmu thei bawk hek lo.

⁴Ka lu a hai zo ta, hlauvin ka buai ta e, Ka nghahhlelh ṭhin tlai ni nêm chu Ka tân khurh hun a ni ta zâwk.

⁵Ruai an lo buatsaih a, ṭhut nân pherte an lo phah a, Eiin an in ta a. “Tho thuai teh u, hruaitute u, In phâwte kha peih fel teh u,”

⁶ LALPA chuan ka hnênah heti hian a ti: “Kal la, râl vêng tûr mi dah rawh, A hmuh apiang sawi zêl rawh se.

⁷Sakawr chungchuang, a kawpa lo kal te, Sabengtunga chuang te, Ngun takin en rawh se.”

⁸Râlvêngtu chu a au va, “Ka pu, vênbûk sângah ka ding reng a, A chhûn a zân mu hauh lovin ka thlîr reng e,” tiin.

⁹Sakawr chungchuang, a kawpa lo kalte, An lo thleng thut mai le! “Babulon khua a chhe ta, a chhe ta, An milem pathiante a tlu bung rem rum mai,” Râlvêngtu chuan a ti.

¹⁰Ka mi, Israel, hruiha chîl nek tawh hnute u, Israel-te Pathian, Engkim LALPAN chanchin min hrilh tâk hi, In hnênah pawh ka rawn puang ve a ni.

¹¹Duma chungthu: Edom ram aṭangin min rawn au va, “Râlvêngtu, zân a rei tawh em?”

¹²Râlvêngtu chuan, “Khua a vâr dâwn tawh a, Zân a lo thleng leh mai ang, Hriat i duh chuan lo kal leh la, Min rawn zâwt leh ang che,” a lo ti a.

¹³Arabia chungthu: Dedan mi ran rual nêna Arabia ram phûla riakte chu,

¹⁴Tema khaw mite u, Tuihâlte tân tuisik han la ula, Râltlânte hi chaw nên lo hmuak rawh u.

¹⁵Khandaih te, khandaih phawi sa te, Thalngul kawih sa te, Indona râpthlâk tak ata te tlânchhia an ni.

¹⁶ LALPA chuan ka hnênah heti hian a ti: “Inhlawhfa kum chhiara kum khat a tlin veleh Kedar ropuina chu a tawp ang.

¹⁷Kedar mi huaisen, thal kâp mite chu, tlêm tê chauh thi bâng an awm ang,” LALPA, Israel-te Pathian chuan a ti.