Read Mizo Lushai Isaia 22 Bible Online

Isaia 22 - Mizo Lushai bible

Isaia 22

¹Inlârna ruam chungthu: Eng in ti nge in chung zâwla in lâwn tâk ṭheuh?

²Khawpui chhûng a ri ta mur mur mai, An au chûl a, an sâhâwk ta, In mitthite khandaiha thah an ni lo va, Inkahnaa thi lah an ni hek lo.

³In hotute an tlânchhia a, Thal khat mah thlah lovin an man, An hmuh apiang an man che u, Thui tak tlânchhe tawh mah ula.

⁴Min kalsan vek teh u, Ka mi thi tate hi ka ṭah tlawk tlawk dâwn e, Min hnem pawh tum suh u.

⁵Inlârna ruamah hian manganna ni, Inrahbeh leh chiaina ni, LALPA, Engkim LALPAN a rawn thlentîr tâk hi. Khaw kulh bang chu an chhu chhia a, Mangang au thâwm chuan tlâng tin a nghawr ta e.

⁶Elam sipaite chu thal bâwm paiin Sakawr tawlailîrah an lo chuang a, Kir mite chuan an phaw an phawrh.

⁷In ram phaizâwl ṭha laiah chuan, An tawlailîr a awm khup a, Sakawr chungchuang mite pawh Kulh kawngkhâr bulah an ding hmur mai.

⁸Judai ram inhumhimna an ṭhiat zo ta. Chumi hun chuan thuam dahna ata râlthuam in la chhuak a,

⁹Davida khaw kulh bang chim laite chu in en vek a, Dîl thlangta zâwka tui chu in chawi khâwm a.

¹⁰Jerusalem khuaa inte pawh in en vek a, a ṭhente chu kulh bang chhe thawm nân in ṭhiat a.

¹¹Khaw kulh chhûngah tuikhuah in siam a; Dîl hlui aṭanga tui lo luang chhêk khâwm nân in hmang a. Hmasâng ata hetiang thil lo ruat lâwka, Tithlengtu chu in ngaihsak si lo.

¹²Chumi ni chuan, LALPA, Engkim LALPAN ṭapa chiau vawng vawng tûr lehlu mêt kawlha, saiip puan sin tûrin a ti che u;

¹³Mahse, nuiin in hlim viau va, Bâwng leh berâm talhin ruai in ṭheh a, Zu in chên a, “I eiin i in ang u, Naktûkah chuan kan thi mai ang,” in ti.

¹⁴Engkim LALPAN ka hnênah ngei a sawi, “An dam chhûng chu he an thil sual tih avâng hian, Ka ngaidam hauh lo vang, Kei, LALPA, Engkim LALPAN ka sawi tawh hi.”

¹⁵ LALPA, Engkim LALPA chuan heti hian ka hnênah a ti: “Hawh teh, lal sum enkawltu Sebna hnênah va kal la, heti hian va ti rawh:

¹⁶‘Tu nge maw i niha, i thlân tûr i ker vei le? Tlângpang lungah an zalhna tûr che i ker vei a.

¹⁷Ngai teh, mi pawimawh tak ni mah la, LALPA chuan a lên lawp ang che a, a vawrh daih ang che.

¹⁸Bâwl angin a la ang che a, ram zau takah a lum nek ang che; tah chuan, i chhuan êm êm, i tawlailîr bulah i thi ang; i pu chhûngte i tizak hle dâwn a ni.

¹⁹I hna ata ka bân ang che a, hotu i nihna ata i tla ang.

²⁰Chumi hun chuan ka chhiahhlawh, Eliakima, Hilkia fapa chu, ka ko vang a,

²¹i kawrfual ropui chu ka hâktîr ang a, i kâwnghrên pawh ka hrêntîr ang. I thuneihna zawng zawng a hnênah ka hlân ang a, Jerusalem-a chêngte leh Judai rama mite tân pa a ni ang.

²²Davida chhûngte chabi chu a kutah ka dah ang a, a hawn tawh chu tu man an khâr lo vang a, a khâr tawh chu tu man an hawng hek lo vang.

²³Leichâra ban angin nghet takin ka phun ang a, a chhûngte tân a chhuanawm êm êm ang.

²⁴A laichînte leh a tu leh fate chuan an bêl ang a, an chhûngkaw mamawh zawng zawng, bungbêl leh no chenin amahah a innghat vek ang.’ ”

²⁵Engkim LALPA thuchhuak chuan heti hian a ti: “Chutih hunah chuan leichâra nghet taka ban phun chu a nghîng ang a, a phawng ang. Amah bêltu zawng zawng tâwpna a ni ang,” tiin.