Read Mizo Lushai Isaia 23 Bible Online

Isaia 23 - Mizo Lushai bible

Isaia 23

¹Tura khaw chungthu: Tarsis lawngpute u, chiau vawng vawng rawh u, Inte chu lawngchawlhna chenin a chhe zo ta, Kupra thliarkâr in thlen hunah chauh chu chu in hria.

²Tuifinriat kama awmte u, ngawi ṭhiap rawh u, Sidon khuaa sumdâwngte u, Tuipui zau tak kânin in sumdâwng a;

³Sihor phai buh, Nail lui kama thar chu in zu lei a, ram dangahte in hralh leh a,

⁴Aw, Sidon khawpui, i mualpho ta e, Tuifinriat thûk tak chuan “Nau ka vei ngai lo va, ka hring ngai hek lo, Fanu fapa ka châwm lian bawk hek lo,” A tihsan tâk che hi.

⁵Tura chhiat tâk thu hi Aigupta miten an hriatin pawi an ti a,

⁶Tuifinriat kama mite u, chiau vawng vawngin Tarsis lamah kal kai rawh u.

⁷Hei hi maw hmânlai ata khaw hlun, Khaw inchhuang tak ṭhîn chu? Tuipui râla khaw thar din tûr, He khua aṭang hian maw chhuak ṭhîn?

⁸Lallukhum, mite an khumtîr a, An sumdâwng mite chu mi ropui tak tak an ni a, An dâwrkaite ram tin ngaihsân an ni bawk a. Tura chunga thil thleng ta chu tu tih nge ni?

⁹Engkim LALPAN a tih a ni, An chhuan êm êm an ropuina a titâwp a, An mi zahawmte chu a timualpho ta e.

¹⁰Nail lui kam angin in ram chu let ula, Tarsis mite u, lawng chawlhna tûr in nei ta lo.

¹¹ LALPAN tuifinriat chungah pawh kut a lek a, Lalram tam tak a sâwi chhe ta, Kanan mite hmunpui Nuai bo tûrin LALPAN thu a pe e.

¹²Sidon nula thianghlim, mi sawisak hnu, I uang tawh ngai lo vang. Kupra thliarkâr lamah tlân vei mah la, I him chuang hauh lo vang.

¹³Tura khua, ram sakawlh tlat nâna siamtu chu, Asuria ni lovin Babulon hi a ni; khaw hual nân in sâng an sa a, a kulhte chu an ṭhiat a, khua chu a chim chhe ta.

¹⁴Tarsis lawngpute u, chiau vawng vawng rawh u, In hmunpui chu a chhiat tâk hi.

¹⁵Chutih hunah chuan lal pakhat lal hun chhûng, kum sawmsarih chhûng chu, Tura khua hi tu man an hre lo vang. Kum sawmsarih a ral hnuah Tura chu he hlaa nawhchizuar ang hi a ni ang:

¹⁶Tu man an hriat tawh loh, nang nawhchizuar, Perhkhuang kengin khua fang leh la, Ṭingṭang perhin hla mawi tak tak sa rawh, An hriat leh theih nân che.

¹⁷Kum sawmsarih a ral hnu chuan LALPAN Tura khua chu a kan ang a, a tih ngai a tihtîr leh ang; khawvêl ram tinah a inzuar leh ang.

¹⁸A deh chhuah chu LALPA tâna hlan a ni ang. A thukru lo vang a, a kawl ru hek lo vang. LALPA hmaa chêngten hnianghnâra ei tûr leh silhfên ṭha ṭha lei nân an hmang ang.