Read Mizo Lushai Isaia 24 Bible Online

Isaia 24 - Mizo Lushai bible

Isaia 24

¹ LALPAN lei hi a tiṭiau dâwn, a ram dêr ang, A khaikhup thawk ang a,

²A chhûnga chêngte chu a theh chhuak vek bawk ang. Mi narân leh puithiam, chhiahhlawh leh a pu, Chhiahhlawhnu leh a pi, thil leitu leh hralhtu, Pûktîrtu leh pûktu, battîrtu leh batu, An tuar a inang vek bawk ang.

³Lei chu bun ruah a ni ang a, A ruak vek ang. He thu hi LALPA sawi a ni.

⁴Lei chuan a sûn ang a, a nguai ruai ang, Khawvêl chu lungngaiin a chau vang a, Lei leh vân pawh a dul ruih ang.

⁵A chhûnga chêngte chuan lei hi an tibawrhbâng ta a, Dân chu an bawhchhia a, thupêk an awih lo va, Kumkhaw thuthlung an pawisa lo.

⁶Chuvângin, leiin ânchhia a dawng ta a, A chhûnga chêngte chuan sual man an têl, Leia mite chu an kâng chiam a, Thi bâng an tlêm hle mai.

⁷Grep hrui a vuai zo va, Uain pawh a vâng tial tial, Hlim taka awm ṭhînte an ngui zo ta.

⁸Benchhek bênga an hlim leh lâm, Au thâwm a dai zo ta. Perhkhuang perh ri hriat tûr a awm ta lo.

⁹Zaiin uain an in tawh lo va, Zu thlum an in pawhin kha an ti zêl,

¹⁰Khawpui chu a chhiain a buai zo ta, In zawng zawng chu an kalh vek a, luh theih a ni lo ve.

¹¹Mangang takin kawtthlêrahte an au, Uain in tûr a awm tâk loh avângin Hlimna tûr rêng a awm ta lo, Lei lâwmna pawh a bo zo ta.

¹²Khawpuite chu a chhe zo va, Kulh kawngkhârte pawh chhut chhiat a ni.

¹³A rah an sâwi tlâk hnu oliv kûng leh, An lawh nawn tawh grep hrui ang hi Khawvêla chêng hnam tin an la ni dâwn.

¹⁴La damte chu lâwmin an au vang a, Khawthlang aṭangin LALPA ropuizia chu an aupui ang,

¹⁵Khawchhak lamah pawh LALPA an chawimawi ang a, Israel-te Pathian, LALPA hming chu, Tuipui kama chêngte pawhin an fak bawk ang.

¹⁶Kâwlkil aṭangin, “Mi Dika chu chawimawi rawh u,” Ti-a hla sa kan hre bawk ang. Ka chau ta, ka chau ta, ka chung a va pik êm! Min phattu chuan min phat zêl e, Min phat dân pawh a râpthlâk tial tial mai.

¹⁷Lei mite u, thil râpthlâk tak a lo thleng dâwn, Leilâwta tlâk leh fala delh in hmabâk e.

¹⁸Thil râpthlâk hlauva tlânchhia chu, Leilâwtah an tla ang, Leilâwt ata lo vâk chhuak chu falin a delh dâwn si. Vân tukverh inhawngah ruahpui a lo sûr chiam ang a, Lei nghahchhan pawh a nghîng bawk ang.

¹⁹Lei hi a khi ang a, a kak phawk ang, A phel ruah bawk ang a, a nghîng dur dur ang.

²⁰Zu rui angin a thle a thle ang a, Thlâm sâwi del del ang hi a ni bawk ang. Suahsualna chu a nasa êm a, A tlûk phah ang a, a tho leh tawh lo vang.

²¹Chutih hunah chuan, Chung lam thiltihtheihnate leh Leia lalte LALPAN a hrem dâwn a ni.

²²Tângho khuarkhuruma dah khâwm angin Lalhote chu a khung khâwm ang a, Nakin hnua hrem tûrin a tântîr ang.

²³Thla a zak ang a, Ni a zak bawk ang, Zion tlângah, Jerusalem-ah chuan Engkim LALPA chu lalah a ṭhu ang a, Upate chuan a ropuizia an hmu ṭhîn ang.