Read Mizo Lushai Isaia 25 Bible Online

Isaia 25 - Mizo Lushai bible

Isaia 25

¹Aw LALPA, ka Pathian i ni, I hming chawimawiin ka fak ang che, Thil mak tam tak i ti ṭhîn a, Hmânlai aṭanga i remruatte Rinawm takin i tihlawhtling ṭhîn.

²Khawpuite chu i tichhia a, A kulhte chu i tichim a, Hnam dang khawpuite chu a ram ang a, Sak ṭhat a ni tawh lo vang.

³Tichuan, hnam chak tak takten an fak ang che a, Hnam râwng tak tak khuate pawhin an ṭih ang che.

⁴Rethei leh ṭanpui ngaite tân kulh i ni a, An mangang chu an lo tlân ṭhîn, Thlipui lakah i lo hum a, Chhûn ni sâah i daihlimah an biru ṭhîn.

⁵Thlipuiin bangte a nem sawk sawk ang hian Mi nunrâwngten an rawn bei ṭhîn. Ram ro taka mei sa ang hi an ni. Mahse, nang chuan hnam dangte thâwm i tidai a, Chhûm zîngin khaw lum a tidai ta ang hian.

⁶He tlângah hian Engkim LALPAN mi zawng zawng tân ruai tui tak a ṭheh dâwn, uain thlum ṭha ṭha, a tuitlingte nên, sa tui tui, a thlîngte nên ruai a buatsaih dâwn a ni.

⁷Ka tlângah hian mi zawng zawng tuamtu, hnam tin khuh ṭhîntu, lungngaihna chu, a hlîp daih ang.

⁸LALPA Pathian chuan thihna chu a hneh ang a, a mite mittui chu a hru hul ang; miten khawvêl puma a mite an hnehchhiahna chu a tireh bawk ang; LALPAN chu chu a sawi tawh hi.

⁹Chumi hun chuan “En teh u, hei hi kan Pathian chu a ni. Amah kan ring a, min rawn chhan ta a nih hi. Ani hi LALPA chu a ni a, amah kan ring a, min chhandam avângin i hlim ang u,” an la ti ang.

¹⁰ LALPAN Zion tlâng hi a hum ang a, Moab erawh chu buhpâwl, êk khura an chîl pil ang hian a chîl pil ang.

¹¹Tui hleuh tum angin an bân an phar ang a; mahse, LALPAN an chapona chu a tihhniamsak ang a, an kut themthiamnate pawh a tihbosak bawk ang.

¹²An kulh bang sâng tak takte chu a tichim ang a, lei vaivutah a let rum ang.