Read Mizo Lushai Isaia 26 Bible Online

Isaia 26 - Mizo Lushai bible

Isaia 26

¹Chumi ni chuan Judai ramah he hla hi an sa ang: “Khawpui rinawm takah kan chêng a, Kan inhum nân kulh bang min siamsak hi.

²Kulh kawngkhârte chu hawng ula, Hnam rinawmte lo lût rawh se, Thil dik ti ṭhîn hnam chu.

³Nghet taka nangmaha innghatte chu Thlamuang takin i awmtîr a.

⁴ LALPA chu kumkhuain ring tlat rawh u, LALPA chu chatuan himna lungpui a ni.

⁵Sâng taka awmte chu a hnûk thla a, An chênna khaw rinawmte a tichhia a, An kulh bangte vaivutah a chantîr ṭhîn.

⁶Tah chuan baihvaite pawh duh duhin an kal a, An duh duhnaah chuan an vâk.

⁷Mi dikte kawng i siam nuam a, An kalna chu i titluang ṭhîn.

⁸A ni, LALPA, i duhzâwng kawng zawngin ka nghâk a che, I hming hriat reng hi ka duhzâwng ber a ni.

⁹Zân a lo ni a, ka ngai êm êm che a, A ni, ka thlarau hian a zawng chiam ṭhîn a che, Lei chunga ro i rêl hun chuan A chhûnga awmte chuan rorêlna dik an hre tawh ang.

¹⁰Mi sualte chuan khawngaih hlawh mah sela, Thil dik tih zir an tum chuang lo, Dikna ramah pawh hian thil sual an ti zêl a, LALPA ropuina chu an hmu duh lo.

¹¹I kut i lek pawhin an hmu duh lo, I mite hi i duat ṭhinzia hmuhtîr ang che. Hmu se, mualpho rawh se, I hmêlmate tâna i buatsaih meiah chuan kâng ral rawh se.

¹² LALPA, râlmuanna min pe a, Kan thil tih vete pawh nangma min tihsak vek a ni,

¹³Aw LALPA, kan Pathian, lal dang kan chungah hian an lal ṭhîn a, Mahse, nang chauh hi kan lal chu i ni.

¹⁴An thi mai a, an nung leh dâwn tawh lo, An thlarau pawh a tho leh tawh lo vang. Anni chu i hrem a, hriat zui tûr an awm lo,

¹⁵ LALPA, kan hnam min tipung a, min tilian a, Kan ramrite min zauhsak a, Nangmah i inchawimawi ta zâwk a ni.

¹⁶ LALPA, an manganin an pan che a, Anni chu i hrem a; mahse, an au lawm lawm ṭhîn che.

¹⁷Hmeichhe nau vei na tuar rûm rûm angin, LALPA, i hmaah kan awm hi.

¹⁸Nau pai angin kan vei na a, Eng mah kan hring si lo; Kan ram pawh kan chhan thei lo va, Tih theih eng mah kan nei lo.

¹⁹I mi, thi tate chu an nung leh ang a, An ruangte chu a tho leh ang. Vaivuta mu tawhte an lo ṭhangharh ang a, Hlim takin an zai ang. Hnah vuai, daifîmin a tiharh leh ang hian Thi tawhte pawh LALPAN a rawn tiharh leh ang.”

²⁰Ka mite u, in pindan chhûngrila lûtin, Kawng inkhâr khum ula, Pathian thinur a kian hma chu lo biru rih teh u.

²¹A chênna vân ata LALPA a lo kal ang a, An sual avângin lei mite chu a rawn hrem ang. Tual thah rûkte an puang ang a, An ruangte pawh leiin a khuh bo tawh lo vang.