Read Mizo Lushai Isaia 27 Bible Online

Isaia 27 - Mizo Lushai bible

Isaia 27

¹Chumi hun chuan LALPAN a khandaih lian pui, hriam tak chu tuipuia Leviathan, rûlpui tlânchhia, Dragon tleng nghuat nghuat hrem nân a lek ang a, a that ang.

²Chumi hun chuan LALPAN a grep huan duhawm tak thu chu heti hian a sawi ang:

³“Kei LALPA hi a vêngtu ka ni a, Eng lai pawhin tui ka leih a, Tu man an khawih loh nân chhûn leh zân ka vêng a ni.

⁴A chungah chuan ka thinur tawh lo va, Thlawh fai tûr hlîng leh hlohar lo awm mah se, Ka hâl ral zêl bawk ang.

⁵An hmêlmaten ka vên an duh ve chuan, Min rawn rem sela, Kei hi min rawn rem mai rawh se.

⁶Engtik hunah emaw Jakoba thlahte chuan zung an thlâk leh ang a, Israel chu a chawrnovin a pâr leh ang. Leiah an rah a khat vek ang.

⁷Israel-te chu anmahni vawtu a vuak tlukin a vaw lo va, Anmahni thattute a that tam zâwk.

⁸Saltâng tûrin a tîr chhuak a, Khawchhak thli hrâng a lâktîr ta.

⁹Hnam dang maichâm lungte, Chinai lung ang maiin an râwt dip a, Aseri lim leh inthawina lung an paih fai vek hunah, Israel-te sual chu ngaihdam a ni ve ang.

¹⁰Khawpui kulh neite chu a chim zo ta, Khaw ram a ni ta a, thlalêr ang mai a ni. Tah chuan ran rualte an tla a, An riahna hmun, an tâl vêlna a lo ni ta.

¹¹Thingzârte chu rovin a tliak ta a, Thingtuah atân hmeichhiaten an fawm ta, Eng mah hre hlei thei lo hnam an nih hi, An siamtu chuan a khawngaih lo vang a, Anmahni dintu chuan a lainat hek lo vang.”

¹²Chumi hunah chuan LALPAN Eufretis lui aṭanga Aigupta lui thlengin, buh seng angin a mi, Israel-te chu pakhat khatin a lâwr khâwm ang.

¹³Chumi hun chuan tawtawrâwt lian pui an hâm ang a, Asuria rama pil bote leh Aigupta-a hnawh thlâkte chu an lo kîr ang a, Jerusalem tlâng thianghlimah chuan LALPA chibai an bûk ang.