Read Mizo Lushai Isaia 28 Bible Online

Isaia 28 - Mizo Lushai bible

Isaia 28

¹Ruam ram ṭha tak bula awm, Efraim rui thal dêr chung chu a pik e. Zu rui pârṭhi awrh a vuai angin, An chhuan khawpui, lallukhum mawi chu, A chuai mai dâwn.

²Anmahni bei tûrin mi chak leh huai LALPAN a hual tawh a, Thli hrâng lo thawk, rial tla chum chum, Ruahpuivânâwn lo sûr, tui lian bulh bulh angin, An ram a rawn nuai nek dâwn e.

³Efraim hotu rui bûr, chapo takte chu, A rawn raphrual zêk ang.

⁴Ruam ram ṭha tak bula awm ropui leh mawi tak chul ta chu, Nipui a thâwk hlima theipui lo hmin hmasa hmutuin, A lova a hmawm nghâl mai ang hi a la ni dâwn.

⁵Chumi hun chuan Engkim LALPA ngei chu, Thi bâng la awm, a mite tân Lallukhum ropui leh diar mawi tak a ni ang.

⁶Rorêltu chu rorêl thiamna a pe ang a, Khaw vêngtu chu râl dang tûra huaina a pe bawk ang.

⁷Zâwlnei leh puithiamte meuh pawh, Uain ruiin an pai an pai tâk saw, Uain leh rakzu an in tam a, An rui buai a, an thle an thle a ni. Zâwlneite chu inlârna an hmuh Dawngsawng thei lo khawpin an rui a. Puithiamte pawh an hnêna thu an rawn thlen Rêl thei lovin an rui bawk.

⁸Dawhkânahte an luak niai nuai a, Bawlhhlawh hlîrin a khat.

⁹“Hriat tûr tu nge zirtîr a tum veia, A thu tu tân nge ngaihthlâk tham awm ang? Hnute nghei tîr naupangchhe tân em ni?

¹⁰Thupêkte chu a hawrawp mal malin, A tlar tê tê, eng emaw hlek hlek Min zirtîr a tum hi!” an ti.

¹¹Hnam dang ṭawng, lam rîk har tak hmangin Ka mite hi LALPAN thu a hrilh ang.

¹²Hahdam taka châwl der der tûrin a sâwm ṭhîn a, Mahse, an ngaithla duh si lo.

¹³Chuvângin, LALPA thu chu an tân, A hawrawp mal malin, a tlar tê têin, Eng emaw hlek hlek chauh a lo thleng ang. Tichuan, in kalkawngah in tlu ang a, Hliam in tuar ang a, man in ni ang, An hruai bo daih ang che u.

¹⁴Jerusalem-a chêng, Ka mite chunga rorêltu chapote u, LALPA thu hi ngaithla rawh u:

¹⁵“Thihna nên thu kan thlung tawh a, Mitthi khua nên thu kan intiam tawh e, Hremna luipui lo lian mah se, Min chîm ve tawp lo vang. Inphen nân bumna kan hmang a, Inhumhim nân dâwt kan ruai ta,” in ti vei a.

¹⁶Chuvângin, LALPA Pathian chuan heti hian a ti: Ngai teh, Zion-ah chuan lung ka phûm ta, Lung him rinawm tak chu, A kil lung ṭangkai leh hlu tak chu ka dah ta, A ring ngam chu an nghîng lo vang.

¹⁷A tihngîlna hrui atân rorêlna dik leh A sahâl khai atân dikna ka hmang a ni. Dâwta an inhumhimna chu rialin a chhu chhia ang, An inphenna pawh chu tuilianin a la ang.

¹⁸Thihna nêna in thuthlung chu sût a ni ang a, Mitthi khua nêna in thutiam pawh chu ṭhiat a ni ang. Hremna lui lo lian chuan, Nangni pawh a chîm pil ngei ang che u.

¹⁹A lo thlen chuan a la ngei dâwn si che u a, A tûk têlin a lo liam zêl ang a, Chhûn zân zawmin a lian reng dâwn si a, A thu awmzia hi hria ula, In va thlaphâng dâwn êm!

²⁰‘Thluanna tham loh khum tawi lutuk, Inkhuh dâwna puan tawngchham lutuk’ tih ang hi a ni.

²¹Perazim tlâng chungah leh Gibeon ram ruama a che ang khân, A thil tih tum mak tak tak leh A thawh tum ril tak tak chu LALPAN a rawn ti ang.

²²Min nuihzat teh suh u, Chutilo zawng, in chan a chau sauh ang, LALPA, Engkim LALPAN ram pum tihchhiat a tum a ni, Thu a peih fel tawh tih ka hria e.

²³Ka aw hi hria ula, beng chhi rawh u, Ka thu sawi hi ngaithla ula, ngaihven rawh u,

²⁴Lo neitu chuan thlai chin nân lei letin A rît phut kumkhua dâwn em ni?

²⁵Lei chu a han chûl rual a, Par di a han theh a, Zîra a chîng ta mai a ni lom ni? A tlarin huit a chîng a, A hmun tûrah barli a theh; Vau hrûlah mîm a chîng bawk ṭhîn.

²⁶Pathianin an tih tûr a hrilh a, A zirtîr ṭhîn a ni.

²⁷Talhtum lianin zîra an vaw lo va, Tawlailîrin pardi an chîl ngai bawk hek lo. Talhfiak hmangin zîra an vaw ṭil a, Hmawlhte nên pardi an khâwng bawk ṭhîn.

²⁸A fang keh sawm khawpin huit chu an chîl lo va, Keh lo tâwka sakawr-tawlailîr chiltîr dân an thiam.

²⁹Hêng finna hi Engkim LALPA pêk vek a ni, Pathian thil rêlte chu a fing êm êm a, A puitling ngei ngei ṭhîn.