Read Mizo Lushai Isaia 29 Bible Online

Isaia 29 - Mizo Lushai bible

Isaia 29

¹Aw, Jerusalem, Jerusalem, Pathian maichâm, Davida awmhmun khuarna khawpui! I va khawngaihthlâk êm! Kum hnih khat chu lo veiin, Kûtte lo hmang leh pawh ni ula.

²Tah chuan, Jerusalem chu ka rawn hual ang, Ṭapin an chiau vawng vawng ang, Khuaah thisen a luang ang a, ‘Pathian maichâm’ ang hian a sen hnuang ang.

³Bei tûr chein ka hual tlat dâwn a che, I vêlin lei ka chhûng pâwng ang a, Palin ka theu hnan ang che.

⁴I tlu zangthal dêr ang a, Vaivutin a khuh ang che a, Aikaih thiamte an phun ser ser angin Vaivut aṭangin i phun se se chauh vang.

⁵Ram beitu, hnam dang rualte chu, Vaivut dip ang maiin an darh ang a, Mi râwng pui puite pawh thli len buhsi angin, Len bo an ni bawk ang.

⁶Khawpui leh lîrnghîng nên, thâwm nasa tak, Thlipui leh ṭhâwngaleivir nên, Kan ral hmang mei alh hluah hluah nên chuan, Engkim LALPA chu a lo thawk ang.

⁷Jerusalem beitu hnam dang sipai rualte, A kulh huala tihrehawmtute chu Zâna thil hmuh, mumang ang hian an ral duak ang.

⁸Rilṭâm takin mumang lamah chaw a lo ei a, A lo harh a, a puar si lo ang leh, Tuihâl takin mumang lamah tui a lo ina, A lo harh a, a tui a la hâl fo ang hi, Zion tlâng hualtu, hnam dang sipaite chu an la ni ang.

⁹A ngaihna hre lovin hawihai ula, In mitte pawh tidel law law rawh u, Uain in si lovin rui hnêp ula, Rakzu tem si lovin pai pai rawh u.

¹⁰ LALPAN mutchhuahna thliin a chhêmtîr che u a, Zâwlneite mit a tuamsak a, Hmutute lu a khuhsak ta a ni.

¹¹Nangni tân zawng hêng inlârna thute hi lehkhabu châr tlat chhûnga thu ang hi a ni. Lehkha chhiar thiam hnênah, ‘Han chhiar teh,’ tiin an pe a, anin, ‘Châr tlat a ni a, ka chhiar thei lo,’ a lo ti a.

¹²Lehkha chhiar thiam lo hnênah, ‘Han chhiar hrâm teh,’ an tih lahin, ‘Lehkha ka chhiar thiam hlei nêm,’ a lo ti bawk si a.

¹³ LALPA chuan heti hian a ti: “He mite hian an kâ chauhvin min hnaih ṭhîn a, An hmui chauhvin min chawimawi a, Thinlung tak erawh chuan min hlat si. Mihring thupêk bel taka vawn chauh hi, Min ṭih dân chu a ni.

¹⁴He mite chungah hian rin loh tak thil, Thil mak danglam tak chu ka ti ang a, An mi fingte finna a bo vang a, An mi thiamte thiamna a reh tawh ang. ”

¹⁵ LALPA laka an thil tih tum thuptute chu An va la chawh dâwn êm! A rûkin thil an ti emaw tiin “Tu nge hmu ang a, tu nge hria ang?” an ti.

¹⁶A letling zâwngin thu an la a ni, Bellei hian a vawtu a tluk thei dâwn em ni? Thil siam hian a siamtu hnênah, “I siam ka ni lo ve,” a ti thei dâwn em ni? Thil din pawh chuan a dintu chu, “I va â êm!” a ti thei dâwn em ni?

¹⁷Rei lo tê-ah Lebanon ngaw chu lo ṭha a ni ang a, Lo ṭha pawh chu ngawah a chang thuai ang.

¹⁸Chumi hun chuan bengngawngte chuan Lehkha Thu chhiar ri an hria ang a, Thim zînga awm mitdelte chu An mit a meng ang a, an hmu thei ang.

¹⁹Retheite chu LALPA-ah chuan an lâwm ang a, Pachhiate pawh Israel Mi Thianghlima hmaah an hlim bawk ang.

²⁰Mi nunrâwngte an ral ang a, Pathian hmusittute an boral ang. Thil sual tih tum zawng zawng pawh tihbo an ni bawk ang.

²¹Mi dang mi suala puh chînga, Rorêltute rêl sualtîra, Thu lawilova mi dik tuartîrtute chu An ral vek ang.

²²Abrahama chhantu chuan Jakoba thlahte chungthu hetiang hian a sawi: Jakoba chu a mualpho tawh ngai lo vang a, A hmêl a dâng tawh ngai hek lo vang.

²³Ka pêk, an fate chu, an zînga awm an hmuh hun chuan, Ka hming an chawimawi tawh ang a, Jakoba Mi Thianghlima chu an zah ang a, Israel-te Pathian chu an ṭih bawk ang.

²⁴Thlarau lama bote chuan an hrethiam tawh ang a, Phunnawi chîngte pawhin an zir châk hle tawh ang.